काठमाडौं । नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी (नेकपा) आज निर्वाचन आयोगमा दल दर्ताका लागि जाने भएको छ ।
पार्टीका एक स्थायी समिति सदस्यका अनुसार महासचिव नेत्रविक्रम चन्द ‘विप्लव’को नेतृत्वमा आज दिउँसो पौने १ बजे आयोगमा पुगेर दल दर्ता प्रक्रिया सुरु गर्ने तयारी गरिएको हो ।
यसअघि नै पार्टीले स्थायी समिति सदस्य कर्णजित बुढाथोकीको संयोजकत्वमा तीन सदस्यीय दल दर्ता तयारी समिति गठन गरेको थियो ।
समितिमा केन्द्रीय सदस्य तथा काठमाडौं सेक्रेटरी चिरञ्जीवी ढकाल र वरिष्ठ अधिवक्ता कपिलचन्द्र पोखरेल सदस्य रहेका छन् ।
नेकपा नाममा यसअघि नै अन्य दल दर्ता भइसकेकाले ‘विप्लव’ समूहले नयाँ नामसहित दल दर्ता गर्ने तयारी गरेको बताइएको छ ।
सो पार्टीले औपचारिक राजनीतिक गतिविधि सुदृढ बनाउन र आगामी निर्वाचनमा सहभागिता जनाउनका लागि दल दर्ता प्रक्रियालाई प्राथमिकताका साथ अघि बढाएको जनाएको छ ।
