काठमाडौँ । भाद्र २३ र २४ गते भएका घटनासँग सम्बन्धित जाँचबुझका लागि गठित आयोगले पूर्वगृहमन्त्री रमेश लेखकमाथि लगाइएको भ्रमण प्रतिबन्ध फुकुवा गरेको छ।
आयोगको सचिवालयले जारी गरेको सूचनामा लेखकलाई विदेश भ्रमण गर्न तथा काठमाडौँ उपत्यका बाहिर जान नपाउने गरी लगाइएको पूर्व निर्णय हटाइएको जानकारी दिइएको हो।
यसअघि अनुसन्धानको सिलसिलामा आयोगले असोज १२ गते लेखकलाई आयोगको अनुमति बिना उपत्यका बाहिर तथा विदेश भ्रमणमा जान रोक लगाएको थियो।
आयोगका अनुसार घटनाको छानबिनका क्रममा आवश्यक कार्य सम्पन्न भइसकेकाले उक्त प्रतिबन्ध हटाउने निर्णय गरिएको हो। आयोगकी शाखा अधिकृत रेश्मा बुढा क्षेत्रीले हस्ताक्षर गरेको पत्रमा बयान प्रक्रिया समाप्त भएसँगै लेखकमाथिको कानुनी बन्देज खुला गरिएको उल्लेख छ।
यस निर्णयको बोधार्थ प्रधानमन्त्री तथा मन्त्रिपरिषद्को कार्यालय, परराष्ट्र मन्त्रालय, नेपाल प्रहरी प्रधान कार्यालय तथा सम्बन्धित व्यक्ति रमेश लेखकलाई पठाइएको आयोगले जनाएको छ।
जेनजी आन्दोलनका क्रममा भएका घटनाको छानबिन गरिरहेको आयोगले आजै एमाले अध्यक्ष केपी शर्मा ओलीलाई पनि बयानका लागि बोलाउने तयारी गरेको जानकारी दिएको छ।
