काठमाडौँ, २१ पुस: नेपाली कांग्रेस केन्द्रीय कार्यसम्पादन समितिको बैठक आज बस्दैछ ।
पार्टी केन्द्रीय कार्यालय सानेपा, ललितपुरमा दिउँसो १ बजे बस्ने बैठकमा कांग्रेसको १५औँ महाधिवेशन, आसन्न राष्ट्रियसभा र प्रतिनिधिसभा सदस्य निर्वाचनलगायत समसामयिक विषयमा छलफल हुने पार्टी कार्यालयका मुख्यसचिव कृष्णप्रसाद पौडेलले जानकारी दिनुभयो ।
यसअघि कार्यसम्पादन समितिको शुक्रबारको बैठकले पार्टीको १५औँ महाधिवेशन आगामी वैशाख २८ देखि ३१ गतेसम्म काठमाडौँमा गर्ने निर्णय गरेको थियो ।
अर्कोतिर कांग्रेस केन्द्रीय कार्यालयमा गत असोज २९ गते ५४ प्रतिशत महाधिवेशन प्रतिनिधिले दर्ता गराएको विशेष महाधिवेशनको प्रस्ताव पनि विचाराधीन अवस्थामा रहेको छ ।
पुष १८ गते बसेको कार्यसम्पादन समितिको बैठकले चुनावपछि नियमित महाधिवेशन गर्ने गरी कार्यतालिका पारित गरेपछि पार्टीभित्रको विवाद थप बढेको छ ।
बैठकले वैशाखको २८ देखि ३१ गतेसम्म १५ औं महाधिवेशन गर्ने कार्यतालिका बहुमतको आधारमा पारित गरे पछि बिवाद बढ्दै गएको छ । महामन्त्रीद्वय गगन थापा र विश्वप्रकाश शर्माले विधानत: माग भएको विशेष महाधिवेशन आव्हान गर्ने गरी आन्तरिक तयारीलाई तीव्रता दिनु भएको छ ।
उहाँहरुले शनिबार कांग्रेस निकट कानुन व्यवसायीहरु प्रेमबहादुर खड्का, गोपालकृष्ण घिमिरे , सिताराम केसी, भरतप्रसाद खरेल, यदुनाथ खनाल, योगेन्द्रबहादुर अधिकारी, नरेन्द्र केसी, विमल पौडेल, रामकुमार श्रेष्ठ, सुवास बुढाथोकी, सेमन्त दाहाल, लगायतसँग छलफल समेत गरेका थिए ।
बैठकमा कतिपय कानुन व्यवसायीहरूले महाधिवेशन प्रतिनिधिहरूले आफैं निर्णय गर्ने र त्यो निर्णय वैधानिक हुने सुझाव समेत दिएका थिए ।
