काठमाडौँ । नेपाली कांग्रेसका सभापति शेरबहादुर देउवालाई भेटेर सो पार्टीको इतर समूहका नेता डा शेखर कोइरालाले जसरी पनि विशेष महाधिवेशन रोक्न आग्रह गरेका छन् ।
बिहीबार बिहान कांग्रेसको इतर समूहका नेता डा शेखर कोइराला कांग्रेसका अर्का नेता डा मिनेन्द्र रिजाललाई लिएर देउवा निवास महाराजगञ्ज पुगेका थिए ।
उनीहरूबीच करिब एक घन्टा कुराकानी भएको थियो । सो भेटका क्रममा कांग्रेसका महामन्त्रीद्वय गगन थापा र विश्वप्रकाश शर्माले यही पुस २७ र २८ गते आह्वान गरेको विशेष महाधिवेशनका बारेमा कुराकानी भएको थियो ।
त्यस भेटका क्रममा नेता डा कोइरालाले सभापति देउवालाई सो विशेष महाधिवेशन जसरी पनि रोक्ने काम गर्न आग्रह गरेका थिए । सो आग्रह पछि देउवाले पनि डा कोइरालालाई आफ्ना तर्फबाट पनि महाधिवेशन रोक्ने काममा लाग्न आग्रह गरेका थिए ।
उता हिजो नै कांग्रेस केन्द्रीय कार्यालयले एक विज्ञप्ति मार्फत् महामन्त्रीद्वयले विशेष महाधिवेशन आह्वान गरे पनि त्यो विधानसम्मत नभएको जनाएको छ । नेता डा कोइरालाले पनि महामन्त्रीले मात्र आह्वान गरेर कांग्रेस जस्तो पार्टीको विशेष महाधिवेशन नहुने बताउँदै आएका छन् ।
