काठमाडौँ । नेपाली काँग्रेसका नेताहरुले काँग्रेस एकतावद्ध भएर निर्वाचनमा जाने बताएका छन् ।
महामन्त्रीद्वय गगनकुमार थापा र विश्वप्रकाश शर्माद्वारा आह्वान विशेष महाधिवेशनको समयताका काठमाडौंमा भेला भएका संस्थापन पक्षधर नेताहरुले यस्तो दाबी गरेका हुन् । उनीहरुले निर्वाचनको कार्यतालिका आइसकेकाले अहिले विशेष वा नियमित महाधिवेशनको समय नभएको बताए । नेपाली काँग्रेसका नेता शिव हुमागाईंले आम निर्वाचनको समय आइसकेकाले आन्तरिक समस्या समाधान गरेर अघि बढ्नु नै बुद्धिमानी हुने बताउनु भयो । उहाँले नेपाली काँग्रेसमा देखिएको आन्तरिक समस्यालाई कसरी समाधान गर्न आफूहरु लागिपरेको र शनिवारसम्म निकास निस्किने दाबी गर्नुभयो ।
उहाँले प्रक्रियागत रुपमा सबैसँग छलफल गरेर नयाँ रणनीतिका साथ काँग्रेस अघि बढ्ने बताउनु भयो । महामन्त्रीद्वय विश्वप्रकाश शर्मा र गगनकुमार थापाप्रति आफूहरुको कुनै भनाइ नरहेको तर महामन्त्री पदलाई सबैलाई विश्वासका साथ अघि बढ्ने भुमिका निर्वाह गर्नुपर्ने बताउनु भयो । नेपाली राजनीतिमा कुनैपनि निर्णय राति अन्तिम क्षणमा टुंगिने गरेको भन्दै निर्वाचनको मुखमा नेपाली काँग्रेसलाई एकढिक्का बनाएर अघि बढाउन जरुरी रहेको बताउनु भयो ।
उहाँले भन्नुभयो, ‘निर्वाचनको सेड्युल अघि बढिसकेको छ । आम निर्वाचनको समय आइसकेको छ । यस्तो बेलामा नेपाली काँग्रेसमा देखिएको आन्तरिक समस्यालाई कसरी समाधान गर्ने भनेर हामी उपलब्ध मन मिल्नेले पार्टीलाई विभाजनको संघारमा पु¥याउनु हुँदैन । एकतावद्ध बनाउनुपर्छ भनेर लागेका छौँ । सबैलाई एक ढिक्का बनाएर लैजाने नयाँ उपायबारे छलफल गर्दैछौँ । निर्वाचनको मुखमा नेपाली काँग्रेसलाई एकढिक्का बनाएर अघि लैजाने काममा हामी लाग्छौँ । निर्वाचनको सेड्युल अघि आइसक्यो, यो बीचमा महाधिवेशन, विशेष महाधिवेशन हुने र फाइदा पु¥याउने अवस्था छैन । नेपाली राजनीतिमा कुनैपनि निर्णय राति अन्तिम क्षणमा टुंगिन्छ । नेपाली काँग्रेस पार्टी अहिलेको क्षणमा कुनैपनि हालतमा फुटको संघारमा जाँदैन । एकतावद्ध भएर चुनाव फेस गर्दछ ।’
अर्को नेता मदनकृष्ण श्रेष्ठले विशेष महाधिवेशनको हस्ताक्षरकर्ताहरुले नियमित महाधिवेशन समयमै गर्नुस् भनेर माग गरेकाले सोहीअनुसार निर्णय गरिएको बताउनु भयो । उहाँले निर्वाचन अगाडि महाधिवेशन गर्नसक्ने अवस्था नरहेको बताउनु भयो । दुई महिना ढिलाइ हुँदैमा आपत्ति जनाउनुपर्ने कारण नरहेको बताउनु भयो । नेपाली काँग्रेस कुनैपनि हालतमा नफुट्ने र एकतावद्ध भएर जाने बताउनु भयो ।
उहाँले भन्नुभयो, ‘हामी नेपाली काँग्रेसको पक्षमा छौँ । विशेष र नियमित महाधिवेशनको पक्षमा बहस चलिरहेको छ । विशेष महाधिवेशनको हस्ताक्षरकर्ताहरुले नियमित महाधिवेशन समयमै गर्नुस् भनेर माग गर्नुभएको छ । नियमित महाधिवेशन भएन भने विशेष महाधिवेशनको माग गर्नुभएको छ । पार्टी केन्द्रिय कार्यसम्पादनका बैठकमा धेरै कुरा भएका छन् । चुनाव अघि महाधिवेशन सम्भव नरहेकाले चुनाव पछि गर्नुपर्छ भन्ने माग धेरै सदस्यहरुको छ । ’
नेताहरुले नेपाली काँग्रेसको विधानमा एक वर्ष समय थप गर्न पाइने व्यवस्था रहेकाले वैशाखमा नियमित महाधिवेशन गर्नुलाई अवैधानिक भन्न नमिल्ने तर्क गरे । छिटो महाधिवेशन गर्न क्रियाशिल सदस्यताको काम सम्पन्न गरेको भए पुसभित्रै महाधिवेशन सम्पन्न गर्न सकिने अवस्था रहेको बताए ।
