काठमाडौँ । नेपाली कांग्रेसको विशेष महाधिवेशनको बन्दसत्र सुरु भएको छ।
काठमाडौँको भृकुटीमण्डपमा जारी विशेष महाधिवेशन बिहान ८ बजे नै बन्दसत्र सुरु हुने भनिए पनि प्रतिनिधिको नाम दर्तालगायत काम बाँकी रहेकाले बिहान झन्डै साढे ११ बजे मात्र सुरु भएको छ ।
बन्दसत्रको अध्यक्षता ८८ वर्षीय प्रतिनिधि श्यामकुमार खड्काले गर्ने तयारी आयोजक समितिले गरेको छ । बन्दसत्रको अध्यक्षको जिम्मेवारी ८८ वर्षीय प्रतिनिधि खड्कालाई दिने निर्णय भएको प्रचारप्रसार समिति संयोजक सुभास पोखरेलले जानकारी दिनुभयो ।
महामन्त्रीद्वय गगन थापा र बिश्वप्रकाश शर्माको नेतृत्वमा काठमाडौँको भृकुटीमण्डपमा आइतबारदेखि विशेष महाधिवेशन भइरहेको हो।
यता विशेष महाधिवेशनको अबस्थाका बारेमा नेता शेखर कोइराला आफू निकटका नेता तथा कानुन व्यवसायीहरूसँग छलफल गर्नुभएको छ । कोइरालाको सम्पर्क कार्यालयमा उहाँ निकट केन्द्रीय सदस्य, कानुन व्यवसायी, जिल्ला सभापति लगायत नेताहरू सहभागी रहेको कोइरालाको सचिवालय स्रोतले जनाएको छ ।
