तनहुँ। तनहुँको भिमादमा जिल्लाकै सर्वाधिक पुरस्कार राशिको भलिबल प्रतियोगिता आजदेखि सुरु हुँदैछ । भिमाद नगरपालिका–६ स्थित बेष्ट ब्वाइज क्लबको आयोजनामा आज माघ १ देखि ५ गतेसम्म ‘फस्ट बेष्ट ब्वाइज भलि फेस्ट–२०८२’ प्रतियोगिता हुन लागेको हो ।
आजको पहिलो खेलमा बिहान ९ बजे एपिएफ क्लब काठमाडौँ र जिएम समाज कावासोती नवलपुरबीच प्रतिस्पर्धा हुनेछ । यस्तै, दोस्रो खेलमा ११ः३० बजे जोन घले हार्वेस्टिङ अष्ट्रेलिया (गोर्खा) र न्यू होराइजन भलिबल क्लबबीच प्रतिस्पर्धा हुनेछ ।
संस्थाका अध्यक्ष संसार अन्जान सुवेदीका अनुसार प्रतियोगितामा विजेता समूहले रु तीन लाख एक हजार ९९, उपविजेताले रु दुई लाख एक सय ९९ पुरस्कार प्राप्त गर्नेछ । उहाँका अनुसार सान्त्वना हुने समूहलाई जनही रु ५०–५० हजार नगद पुरस्कार प्रदान गरिनेछ ।
प्रतियोगितामा सर्वोत्कृष्ट खेलाडीले रु २० हजार, उत्कृष्ट सर्भर, सेटर, ब्लकर, लिब्रो, स्पाइकर र उत्कृष्ट प्रशिक्षकलाई जनही रु १०–१० हजार प्रदान गरिनेछ ।
प्रतियोगितामा एपिएफ क्लब काठमाडौँ, जोन घले हार्वेस्टिङ अष्ट्रेलिया (गोर्खा), बेस्ट ब्वाइज गण्डकी प्रदेश, न्यू होराइजन भलिबल क्लब, जिएम समाज कावासोती नवलपुरको सहभागिता रहनेछ ।
स्थानीयस्तरमा खेलकुदको विकास, युवाहरूलाई खेलतर्फ आकर्षित गर्ने तथा भिमादको पहिचान राष्ट्रियस्तरमा स्थापित गर्ने उद्देश्यसहित प्रतियोगिता आयोजना गरिएको अध्यक्ष सुवेदीले बताए ।
प्रतियोगितामा राष्ट्रिय कलाकारको प्रस्तुतिसमेत रहनेछ । माघ १ गते समीक्षा अधिकारी र निश्चल दवाडी, माघ २ गते प्रकाश दुतराज, माघ ३ गते आश्मा विश्वकर्मा, अर्जुन सापकोटा र सविन राईको व्याण्ड, माघ ४ गते बद्री पङ्गेनी र शान्तिरानी परियारको प्रस्तुति रहनेछ ।
