काठमाडौँ : नेपाली काँग्रेसले शेरबहादुर देउवाको अभिभावकीय भुमिकाको खाँचो रहेको बताएको छ ।
शनिवार बानेश्वरमा बसेको काँग्रेसको केन्द्रीय समितिको बैठकले देउवाको अभिभावकिय भुमिकामा बस्न आग्रह गरेको हो । काँग्रेसका प्रवक्ता देवराज चालिसेले काँग्रेसलाई देउवाले पु-याउनुभएको योगदान र नेतृत्वको उच्च मूल्याङ्कन गर्दै आभार व्यक्त गर्ने निर्णय गरेको जानकारी दिनुभयो ।
उहाँले आगामी दिनमा पार्टीलाई देउवाको अभिभावकिय भुमिका निरन्तर रहिरहने विश्वास गरेको पनि बताउनु भयो । वैठकले निवर्तमान केन्द्रिय कार्यसमिति र अन्य नेताहरुलाई पार्टीको काममा फर्किन आग्रह समेत गरेको छ । पार्टीलाई अझ बढी बलियो बनाउन आ–आफ्नो तहबाट महत्वपूर्ण योगदान पु-याउन सबैसँग आग्रह गरिएको प्रवक्ता चालिसेले जानकारी दिनुभयो ।
उहाँले पाटीले निर्वाचन केन्द्रित गतिविधि सञ्चालन गर्न लागेको पनि जानकारी दिनुभयो । निर्वाचनको लागी छोटो समय रहेकोले निर्वाचनसम्बन्धी काम गर्नको लागी तत्कालै संसदीय वोर्डको बैठक बस्ने उहाँले बताउनु भयो । बोर्डको बैठक बसेर उम्मेद्वार छनौट लगायतका काम गर्ने जानकारी दिनुभयो । उहाँले पार्टी अहिले निर्वाचनमा केन्द्रित भएको पनि बताउनु भयो ।
उहाँले भन्नुभयो, ‘उहाँले नेपाली काँग्रेसलाई पु¥याउनुभएको योगदान र दिनुभएको नेतृत्वको उच्च मूल्याङ्कन गर्दै आभार व्यक्त गर्ने निर्णय गरेको छ । उहाँको आगामी दिन हाम्रो पार्टीलाई उहाँको अभिभावकिय भुमिका निरन्तर रहिरहनेछ भन्ने विश्वास र आग्रहको साथ आजको बैठकले उहाँलाई अनुरोध र आग्रह गरेको छ । सम्मान पनि गरेको छ । त्यसैगरि निवर्तमान केन्द्रिय कार्यसमितिका साथीहरु र हाम्रा अग्रज नेताहरुलाई पनि पार्टीको यो घडीमा पार्टीलाई अझ बढी बलियो बनाउन, ईतिहासको जस्तै काँग्रेस पार्टी बनाउनको लागि आ–आफ्नो तहबाट महत्वपूर्ण योगदान पु¥याउनुहुनेछ भन्ने विश्वास बैठकले गरेको छ । यी विशेष निर्णय हुन् आजका यी बाहेक हामीले आजदेखि निर्वाचन केन्द्रित गतिविधि सञ्चालन गर्न लागेका छौँ । किनभने हामीसँग छोटो समय छ । छोटो समयमा धेरै टाढाटाढाका साथीहरुको निर्वाचनसम्बन्धी निर्णय लिनुपर्नेछ । उम्मेद्वार छनौट गर्नुपर्नेछ । पार्टीको संसदीय बोर्डको बैठक हामी तत्कालै आजैदेखि बस्नेछौँ र चाँडो भन्दा चाँडो काम गर्नुपर्ने भएको हुनाले अहिले हामी काममा बढी केन्द्रित छौँ ।’
उहाँले निर्वाचन आयोगले काँग्रेसको विधान र संविधानअनुसार नै आफूहरुलाई आधिकारिकता प्रदान गरेकोले मुद्दामामिला नलाग्न अर्को पक्षलाई आग्रह पनि गर्नुभयो । शेरबहादुर देउवा पक्षका नेताहरुले शनिवार नै बैठक बसी आयोगको निर्णय विरुद्धमा सर्वोच्च जाने निर्णय गरेका थिए । –न्युज एजेन्सी नेपाल
नेपाली कांग्रेसको केन्द्रीय कार्यसमितिको २०८२ माघ ३ गते नयाँ बानेश्वरमा बसेको बैठकले गरेका निर्णयहरू –
१ निर्वाचन आयोगले नेपाली काग्रेसको दोश्रो विशेष महाधिवेशनका निर्णयहरूलाई संविधान, कानून र पार्टी विधानअनुसार मान्यता दिई अद्यावधिक गरिसकेको छ। यो कसैको जित-हार होइन— यो विधान र लोकतन्त्रको विजय हो । यस ऐतिहासिक परिवर्तनमा साथ दिने हरेक सदस्य, शुभेच्छुक र सहयोगीप्रति हृदयदेखि केन्द्रिय समितिको यो वैठक हार्दिक आभार व्यक्त गर्दछ ।
२ . यो समय एकता, सद्भाव र सहकार्यको समय हो । देश-विदेशमा रहेका सवै काग्रेसजन, सवै तहका समितिहरू र सबै भातृ तथा सूभेच्छुक सस्थाका साथिहरूलाई नवीन ऊर्जा, अटुट विश्वास र पूर्ण एकताका साथ फागुन २१ को निर्वाचनमा शसक्त रूपमा सहभागि हुन हार्दिक आह्वान गरिन्छ ।
३ . विभिन्न कारणले पार्टीवाट निष्कृय रहनु भएका, विभिन्न कारणले पार्टी छाड्नु भएका सवै साथिहरूलाई पार्टीमा पुन : जोडिन यो वैठक हार्दिकतापूर्वक आव्हान गर्दछ ।
४ . यतिवेला हामी निवर्तमान सभापति शेरबहादुर देउवा लगायतका नेताहरूले नेपाली काग्रेसको नेतृत्वमा रहि लामो समयदेखि पुर्याउनु भएको योगदानको उच्च कदर गर्दै हार्दिक धन्यवाद प्रकट गर्दछ । यो वैठकले श्रद्देय नेताको अभिभावकिय भूमिका प्राप्त हुने विश्वास राख्दछ ।
५, नेपाली काग्रेस आम नेपाली नागरिक प्रति आफ्नो अटल प्रतिबद्धता पून दोहर्याउन चाहन्छ, अब कुनै अप्राकृतिक गठबन्धन वा सत्ताकेन्द्रित सम्झौता हुँनेछैन । हामि सदैव मूल्य र सिद्धान्तमा अडिग रहने छौ । संविधानको रक्षा गर्दै समृद्ध नेपालको नेतृत्व गर्ने छौ । नवयुवाको आकांक्षा र जनताको अपेक्षालाई साकार पार्ने छौ ।
६ . यो नयाँ अध्याय हो— रुपान्तरणको, एकताको, विजयको ।
सवैमा अनुरोध छ, समुन्नत नेपाल निर्माणको महाअभियानमा जोडिनुहोस्। थप स्नेह, विश्वास र साथ दिन सवैमा अनुरोध छ ।
जय नेपाल
देवराज चालिसे
प्रवक्ता
नेपाली कांग्रेस
