सान सेबास्टियन । वैकल्पिक खेलाडीका रूपमा मैदान प्रवेश गरेका मार्कस रासफोर्डले गोल गरे पनि ला लिगा शीर्ष स्थानमा रहेको बार्सिलोना रियल सोसिडाडसँग पराजित भएको छ।
इंग्ल्यान्डका फरवार्ड रासफोर्डले ७०औँ मिनेटमा हेडरमार्फत गोल गर्दै खेल बराबरीमा ल्याएका थिए। म्यानचेस्टर युनाइटेडबाट लोनमा आएपछि उनको यो सबै प्रतियोगितामा आठौँ गोल हो। यसअघि मिकेल ओयारजाबालले ३२औँ मिनेटमा साइड–फुट भलीमार्फत घरेलु टोलीलाई अग्रता दिलाएका थिए।
तर बार्सिलोना एक मिनेट पनि बराबरी अवस्थामा टिक्न सकेन। बराबरी गोलको झन्डै तुरुन्तै गोन्कालो गुएडेसले निर्णायक गोल गर्दै सोसिडाडलाई फेरि अग्रता दिलाए, जुन अन्ततः विजयी गोल बन्यो।
उच्च गतिमा चलेको खेलमा बार्सिलोनाले पेनाल्टी पाएको ठाने पनि भिएआर समीक्षापछि उल्टाइयो। साथै टोलीका तीन गोल अफसाइडका कारण मान्य भएनन्। डानी ओल्मोले दुईपटक पोस्ट प्रहार गरे।
खेलको पहिलो ३० मिनेटभित्रै फर्मिन लोपेज, फ्रेन्की डे योङ र लामिन यामालका गोल अफसाइड भन्दै रद्द गरिएका थिए। त्यसपछि ३२औँ मिनेटमा कप्तान ओयारजाबालले उत्कृष्ट फिनिस गर्दै सोसिडाडलाई अग्रता दिलाए।
पहिलो हाफको इन्जुरी समयमा १८ वर्षीय लामिन यामाल इगोर जुबेल्डियाको चुनौतीमा ढलेपछि रेफ्रीले पेनाल्टी दिएका थिए। तर भिएआर जाँचपछि पुनः अफसाइड देखिएकाले निर्णय उल्टाइयो।
दोस्रो हाफको सुरुवातमा ओल्मोले ४७औँ र ४९औँ मिनेटमा पोस्टमा प्रहार गरे। त्यसपछि वैकल्पिक खेलाडी रोबर्ट लेवान्डोस्कीको हेडर गोलकिपर एलेक्स रेमिरोले बारमा ठोक्काइदिए।
रासफोर्ड मैदान प्रवेश गरेको सात मिनेटमै गोल गर्दै बार्सिलोनालाई बराबरीमा ल्याए। तर त्यसको झन्डै तुरुन्तै गुएडेसले फेरि गोल गर्दै घरेलु टोलीलाई जिततर्फ डोर्याए।
खेलको ८५औँ मिनेटमा जुल्स कुन्डेको हेडर पनि बारमा लाग्दै बार्सिलोनाको दुर्भाग्य कायमै रह्यो।
८८औँ मिनेटमा पेद्रीमाथि ढिला ट्याकल गरेपछि कार्लोस सोलरले सिधा रातो कार्ड पाए र सोसिडाड १० खेलाडीमा सीमित भयो। तर नौ मिनेटको थप समय जोगाउँदै सोसिडाडले लगातार दोस्रो सिजन घरेलु मैदानमा बार्सिलोनालाई हराउन सफल भयो।
यो हारसँगै बार्सिलोनाले यस सिजन ला लिगामा तेस्रो हार बेहोरेको छ। २० खेलबाट ४९ अंक बनाएको बार्सिलोना दोस्रो स्थानको रियल मड्रिडभन्दा एक अंकले मात्र अगाडि छ। जितसँगै रियल सोसिडाड तालिकाको आठौँ स्थानमा उक्लिएको छ।
