लण्डन । शनिबार राति नटिङ्घम फरेस्टसँगको खेलपछि आर्सनलले एउटा ठूलो अवसर गुमाएको महसुस गरेको हुन सक्छ। तर वास्तविकता के हो भने, सन् २००४ को ‘द इन्भिन्सिबल्स’ युगपछि पहिलोपटक प्रिमियर लिग उपाधि जित्ने यसभन्दा राम्रो मौका उनीहरूलाई सायदै फेरि मिल्नेछ।
मिकेल आर्टेटाको टोलीले सप्ताहन्तपछि शीर्ष स्थानमा सात अंकको अग्रता बनाएको छ, किनभने उनीहरूलाई दबाब दिन खोजिरहेका प्रतिस्पर्धी टोलीहरू लगातार चुकिरहेका छन्।
आर्टेटा र आर्सनल सावधानी अपनाउन चाहन्छन्, तर यति अनुकूल परिस्थितिमा पनि उपाधि जित्न असफल भए, ‘गनर्स’ले आफूलाई कहिल्यै माफ गर्ने छैनन्। म्यानचेस्टर सिटीको दबदबा र लिभरपुलको सफलताबीच लामो समयदेखि टाढा रहेको उपाधि जित्ने यो मौका ‘अहिले या कहिल्यै होइन’ जस्तो देखिन्छ।
यदि यति राम्रो अवस्थामा रहेर पनि आर्सनलले यस सिजन उपाधि जित्न सकेन भने, पछुतो निकै गहिरो हुनेछ। उपाधितर्फको सफल यात्राका लागि आवश्यक सबै कुरा उनीहरूसँग छ।
लगातार दुई गोलरहित बराबरीपछि केहीले आर्सनलको आक्रमण क्षमतामाथि प्रश्न उठाएका छन्। तर लिगकै सबैभन्दा मजबुत रक्षा र प्रतिस्पर्धी टोलीहरूको निरन्तर असफलतालाई हेर्दा, अहिले आर्सनलविरुद्ध बाजी लगाउने साहस कमै टोलिले गर्नेछन्।
प्रिमियर लिगमा यसअघि पनि शीर्ष स्थानमा रहेका टोलीले ठूलो अग्रता गुमाएका उदाहरण छन्, त्यो पनि सिजनको पछिल्लो चरणमा। तर आर्सनलभन्दा तल रहेका कुनै पनि टोलीले उपाधिका लागि आवश्यक निरन्तरता देखाइरहेका छैनन्।
म्यानचेस्टर सिटीले आर्सनल नटिङ्घम फरेस्ट जानुअघि दबाब सिर्जना गर्ने अवसर गुमायो। उनीहरू म्यानचेस्टर युनाइटेडसँगको डर्बीमा पराजित भए, जुन उनीहरूको लगातार चौथो जितविहीन खेल थियो।
यता, भिल्ला पार्कमा एस्टन भिल्लाले दोस्रो स्थानमा उक्लने आशा राखेको थियो, तर उत्कृष्ट प्रदर्शन गरेको एभर्टनसँग पराजित हुँदै त्यो सपना चकनाचुर भयो।
डिफेन्डिङ च्याम्पियन लिभरपुलको अवस्था झन् खराब देखिन्छ। शनिबार एनफिल्डमा बर्न्लीसँगको निराशाजनक बराबरीपछि समर्थकहरूको हूटिङ सहनुपर्यो। लिभरपुल अहिले चौथो स्थानमा छ र आर्सनलभन्दा १४ अंकले पछाडि परेको छ।
एस्टन भिल्लाले यसअघि घरेलु मैदानमा लगातार ११ खेल जितेको थियो। तर यस खेलमा एभर्टन निर्णायक क्षणहरूमा खतरनाक देखियो। थियर्नो ब्यारीले गोलरक्षक एमी मार्टिनेजको अनावश्यक शोम्यानशिपको फाइदा उठाउँदै उत्कृष्ट फिनिसमार्फत निर्णायक गोल गरे।
भिल्लाका प्रशिक्षक उनाइ एमरीले सधैंजसो उपाधि दौडको कुरा अस्वीकार गर्दै आएका छन्। यस हारपछि उनले भने, “हामीभन्दा बढी सम्भावना भएका अरू टोलीहरू छन्। हामीले यहाँ ठूलो अवसर गुमायौं। दोस्रो स्थानमा पुग्ने मौका थियो, जुन निकै विशेष हुन्थ्यो। अब हामीले पुनः सम्हालिनुपर्छ।”
उनले थपे, “हार्दा दुःख लाग्छ, जित्दा खुसी। यो सिजन हामी धेरैपटक खुसी भएका छौं।”
भिल्ला अझै पनि च्याम्पियन्स लिग स्थानका लागि बलियो दावेदार देखिन्छ, जुन ठूलो उपलब्धि हुनेछ। तर यस हारले एमरी र घरेलु समर्थकहरूको निराशा स्पष्ट देखियो।
त्यसैले एमरीले हाल रोमाबाट बेसिक्तासमा लोनमा रहेका स्ट्राइकर ट्यामी अब्राहमलाई पुनः भिल्ला पार्क फर्काउने लक्ष्य राखेको विश्वास गरिन्छ। भिल्लाले डोन्येल मालेनलाई रोमा बेचेको छ, जसले डेब्युमा नै गोल गरेका थिए।
भिल्लाको आक्रमण कमजोर देखिनुको प्रमाण यो पनि हो कि यो सिजन उनीहरूले सात प्रिमियर लिग खेलमा गोल गर्न सकेका छैनन्, जुन संख्या पूरै २०२४–२५ सिजनभरको बराबर हो।
यसरी हेर्दा, नटिङ्घम फरेस्टसँग बराबरीमा रोकिए पनि आर्सनलले सप्ताहन्तलाई फाइदामै टुंग्याएको छ। उनीहरूको स्थान झन् बलियो बनेको छ, जबकि वरपरका टोलीहरूले उपाधि दावेदार जस्तो निरन्तरता देखाउन सकेका छैनन्।
हालसम्म म्यानचेस्टर सिटीलाई आर्सनलको सबैभन्दा ठूलो चुनौती मानिएको थियो, तर उनीहरूले पछिल्ला चार खेलबाट जम्मा तीन अंक मात्र जोड्न सकेका छन्।
आर्सनल पछिल्ला वर्षहरूमा प्रिमियर लिगका ‘ग्रेट प्रिटेन्डर’ बनेका थिए—लगातार तीन सिजन दोस्रो स्थानमा समाप्त हुँदै। तर यही सिजन उनीहरूले लामो समयदेखि चाहेको मौका पाएका छन्।
प्रतिस्पर्धीहरू चुकिरहेका बेला, आफ्नै भाग्य आफ्नै हातमा रहेको अवस्थामा, आर्सनल पूर्ण नियन्त्रणमा देखिन्छ। बलियो रक्षा, सबै क्षेत्रमा गुणस्तर खेलाडी र गहिरो स्क्वाड आर्टेटासँग छ।
नटिङ्घम फरेस्टसँगको बराबरीपछि आर्सनलले ढोका अलिकति खुला छोडेको महसुस गरेको हुन सक्छ। तर अब त्यो ढोका झन् बन्द हुँदै गएको छ।
आर्सनलले जे चाहिरहेको छ त्यो पाइरहेको छ। अब यहाँबाट के बिग्रन सक्छ र ?
