मस्को। रुसी राष्ट्रपति भ्लादिमिर पुटिनले बिहीबार अमेरिकी विशेष दूत स्टिभ विटकोफसँग भेटवार्ता गर्नुभएको छ ।
क्रेमलिनका प्रवक्ता दिमित्री पेस्कोभले बुधबार समाचार संस्था, आरबिकेसँग भन्नुभयो, “भोलिका लागि यस्ता सम्पर्कहरू राष्ट्रपतिको तालिकामा छन्।”
विटकोफले डाभोसमा हुने विश्व आर्थिक मञ्चबाट बिहीबार राति ट्रम्पका ज्वाइँ जारेड कुश्नरसँगै मस्को जाने योजना रहेको बताउनसभएको छ ।
अमेरिकी राष्ट्रपति डोनल्ड ट्रम्पले रुस–युक्रेन द्वन्द्वलाई अन्त्य गर्ने विषयमा वार्ता गर्ने जिम्मेवारी दुवै अधिकारीलाई दिनुभएको छ ।
विटकोफले ब्लूमबर्ग टिभीलाई दिएको अन्तर्वार्तामा भन्नुभएको छ, “जेरेड र म बिहीबार राति मस्को पुग्नेछौँ र त्यसपछि संयुक्त अरब इमिरेट्स (युएई) पुग्नेछौँ ।
विटकोफले भन्नुभयो, “रूसले बैठकको लागि अनुरोध गरेको थियो र दुई पक्ष सम्झौताको अन्तिम ‘१० प्रतिशत’ बिषयमा छलफल हुनेछ।”
उहाँले बुधबार युक्रेनी पक्षका अधिकारीहरूसँग भेट गर्ने बताउनुभएको छ।
संयुक्त राज्य अमेरिकाले हालैका महिनाहरूमा दोस्रो विश्वयुद्धपछि युरोपको सबैभन्दा घातक द्वन्द्व (युक्रेन युद्ध) अन्त्य गर्न सम्झौता गर्ने प्रयासहरू तीव्र पारेको छ ।
युक्रेनले सम्झौताको ‘९० प्रतिशत’ सहमति भएको बताएको छ तर रूसद्वारा कब्जा गरेको भनिएका भूभाग नै छोड्ने प्रश्न लगायतका प्रमुख पेचिला मुद्दाहरू अझै पनि समाधान हुन सकेका छैनन् ।
किएभले युद्धपछिको सुरक्षा सुनिश्चिततामा आफ्ना सहयोगीहरूबाट पनि स्पष्टता खोजिरहेको छ, जुन उसले मस्कोलाई नयाँ आक्रमण सुरु गर्नबाट रोक्नको लागि महत्त्वपूर्ण रूपमा हेर्छ ।
यो वार्ता मस्कोको आक्रमणको चौथो वार्षिकोत्सवको रूपमा आएको छ र मस्कोले हिउँदभरि युक्रेनको ऊर्जा सुविधाहरूमा प्रहार गरेको छ ।(रासस/एएफपी)
