काठमाडौँ । नेकपा एमालेका अध्यक्ष केपी शर्मा ओलीले प्रधानमन्त्रीका दाबेदारबीच सार्वजनिक बहसका लागि गरेको आह्वानमा रास्वपाका वरिष्ठ नेता बालेन शाहले अस्वीकार गरेका छन् ।
आईतबार ओलीले सामाजिक सञ्जाल फेसबुकमार्फत् देशको नेतृत्व गर्न खोज्नेसँग ‘पब्लिक डिबेट’ को माग सकारात्मक रहेको बताएका थिए । सो पोष्टमा कमेन्ट गर्दै बालेनले सार्वजनिक बहसमा ओलीसँग आफू एउटै मञ्चमा नउभिने प्रतिक्रिया दिएका छन् । उनले भनेका छन्, ‘७६ जना बच्चाको हत्यारा र उसको मतियारसँग एउटै मञ्चमा उभिनु भनेको म पनि त्यसमा सामेल भएको बुझिनेछ ।’
बालेनले एमाले अध्यक्ष ओलीलाई भदौ २३ गतेको घटनामा जिम्मेवारी लिँदै आफूलाई आतङ्कवादी चाहिँ कहिले स्वीकार्ने भन्दै प्रश्न गरेका छन् । उनले लेखेका छन्, ‘आफूलाई देश जलाउनेको रूपमा स्वीकारेको ठीकै छ, हुन पनि नेताहरूको घर कता कता छन् तपाईंहरूलाई नै थाहा थियो ! तपाईंहरूले आफैँ २३ गते बच्चाहरू मारेको आतङ्कवाद लुकाउन २४ गत्ते जलाएको हो । आफूलाई आतङ्कवादी चाहिँ कहिले स्वीकार्ने हो? त्यो पछि अरू कुरा गरौँला ।’
