काठमाडौं। जाजरकोटकी एक २५ वर्षीया महिला आफूमाथि बलात्कार गर्ने व्यक्ति विरूद्ध कारबाही माग गर्दै सिहदरबारको दक्षिण गेट अगाडी धर्ना बसेकी छिन् ।
सात महिनाको गर्भ रहेको दाबी गर्दै ति महिलाले आफूमाथि बलात्कार गर्ने दार्चुलाका भुपेन्द्रसिंह ठगुन्नालाई कानुनी कारबाही हुनुपर्ने र जन्मपछि शिशुको अधिकार सुनिश्चित हुनुपर्ने माग राखेकी छिन् ।
सिहदरबारको गेट अगाडी धर्नामा बस्दै उनले भनिन् ‘ममाथि बलात्कार भयो भनेर पटक पटक प्रहरी र अदालतलाई सुनाउँदा पनि बेवास्ता गरिएकाले आज मैले यो दिन भोग्नुपर्यो । प्रहरी र अदालतको चरम लापरबाहीको सिकार भएको पात्र हुँ म। न्याय नपाउँदा सम्म जान्न बरु शरीर माथि मोटर गुडाएर मारिदिए हुन्छ ।’
ठगुन्नाविरूद्ध सुर्खेतमा जाहेरी दर्ता भएको छ । जाहेरीपछि ठगुन्नाविरूद्ध जिल्ला अदालतबाट पक्राउ पुर्जी समेत जारी भएको छ। ठगुन्ना प्रहरी जवान भएको ती महिलाले जानकारी दिइन् । न्याय माग्दै ती महिला २५ मंसिरदेखि माइतीघर मण्डलामा अनसन समेत बसेकी थिईन ।
