काठमाडौँ । नेकपा (एमाले)का केन्द्रीय सदस्य तथा मकवानपुर प्रतिनिधि सभा क्षेत्र नं. २ का उम्मेदवार महेश बर्तौलाले १०४ वर्षीया आमा कालीमाया मोक्तानको हातबाट टीका र खादा ग्रहण गर्दै आजदेखि औपचारिक रूपमा आफ्नो चुनावी अभियानको सुरुआत गरेका छन्।
हेटौंडा उपमहानगरपालिका वडा नं. ३ मा आयोजित उक्त कार्यक्रममा पार्टीका केन्द्रीय, प्रदेश तथा स्थानीय तहका नेताहरूको उल्लेखनीय उपस्थिति रहेको थियो।
कार्यक्रममा वक्ताहरूले बर्तौलाको उम्मेदवारीले मकवानपुर क्षेत्रको विकास र समृद्धिमा नयाँ गति दिने विश्वास व्यक्त गर्दै आगामी निर्वाचनमा पार्टीलाई विजयी गराउन एकजुट भएर लाग्न कार्यकर्तालाई आह्वान गरेका थिए।
उक्त अवसरमा स्थानीय कार्यकर्ता, समर्थक तथा शुभेच्छुकहरूको समेत बाक्लो सहभागिता रहेको थियो।
