इङलिस प्रिमियर लिग अन्तर्गत गएराति भएका खेलमा शीर्ष स्थानको आर्सनल र उत्कृष्ट ४ का लागि संघर्षरत लिभरपुल विजयी भएका छन् ।
आर्सनलले लिड्स युनाइटेडलाई ४–० गोल अन्तरले हराएको थियो । लिड्सको गृहमैदान इलान रोड्समा भएको खेलमा लिड्सले निकै राम्रो खेल प्रस्तुत गरेपनि गोल गर्न सकेन ।
आर्सनलका लागि मार्टिन जुबेमेन्डी, कार्ल डार्लो (आत्मघाती गोल), भिक्टर ग्योकेरेस र ग्याब्रिएल जेसुसले गोल गरेका थिए । यो जितसँगै आर्सनलले २४ खेलबाट ५३ अंक बनाएको छ । आर्सनल अब दोस्रो स्थानको म्यान्चेस्टर सिटीभन्दा ७ अंकले अगाडि छ ।
लिड्स भने यो हारसँगै २६ अंकका साथ सोह्रौं स्थानमा छ ।
उता, लिभरपुलले न्यूक्यासललाई ४–१ गोल अन्तरले पराजित गरेको छ । लिभरपुलको गृहमैदान एन्फील्डमा भएको खेलमा गोलको खाता भने न्यूक्यासलका एन्थोनी गोर्डनले ३६औं मिनेटमा खोलेका थिए ।
तर त्यसपछि लिभरपुलले लगातार आक्रामक शैली अपनाएर दबाब बनाएको थियो । यहीक्रममा ह्युगो एकिटिकेले ४१ र ४३ मिनेटमा लगातार दुई गोल गरे । फ्लोरिएन विर्जले ६७ तथा इब्राहिम कोनाटेले ९३औं मिनेटमा गोल गरेर टिमलाई सहज जित दिलाए ।
यो जितसँगै लिभरपुल २४ खेलबाट ३९ अंक सहित लिगको पाँचौं स्थानमा छ । विगत पाँच खेलमा लिभरपुलले तीन बराबरी, एक हार र एक जित निकालेर उतारचढावपूर्ण खेल प्रस्तुत गरेको छ ।
