काठमाडौं । नेपाल आयल निगमले खाना पकाउने ग्यास मागभन्दा बढी आपूर्ति भइरहेको जनाएको छ ।
निगमका कार्यकारी निर्देशक डा. चण्डिकाप्रसाद भट्टले एक तथ्यांक सार्वजनिक गर्दै ग्यास आपूर्ति मागभन्दा बढी भइरहेकोले अनावश्यक सञ्चय नगर्न अनुरोध गरेका हुन् ।
कार्यकारी निर्देशक भट्टका अनुसार नेपालमा दैनिक औसत ९० बुलेट (करिब १ लाख १४ हजार सिलिन्डर) ग्यासको माग रहेकोमा इन्डियन आयल कर्पोरेसन (आईओसी) बाट उक्त परिमाणभन्दा धेरै बढी ग्यास लोडिङ भइरहेको जानकारी दिए ।
गत शनिबार १ सय १८ बुलेट अर्थात् १ लाख ४९ हजार ५ सय सिलिन्डर ग्यास लोडिङ भएको उनको भनाइ छ । त्यसैगरी सोमबार १ सय १५ बुलेट अर्थात् १ लाख ४५ हजार ७ सय सिलिन्डर र मंगलबार १ सय ३२ बुलेट अर्थात् १ लाख ६७ हजार ३ सय सिलिन्डर ग्यास लोडिङ भएको उनले बताए ।
लोडिङ भएका यी बुलेटमध्ये केही नेपाल भित्रिसकेका र केही बाटोमै रहेको र आगामी चुनाव अवधिभरि पनि नियमित रुपमा ग्यास आपूर्ति भइरहने उनले बताए ।
पछिल्लो समय बजारमा खाना पकाउने एलपी ग्यास अभाव भन्दै फैलिएको हल्ला फैलिएपछि उपभोक्ताहरु ग्यास भर्न लामो लाइन लागेर बस्न थालेका छन् ।
