आइसिसि टी–२० विश्वकप क्रिकेट अन्तर्गत गएराति भएको खेलमा वेस्ट इन्डिजले इङल्यान्डलाई ३० रनले पराजित गरेको छ ।
मुम्बईको वान्खेडे रंगशालामा भएको खेलमा पहिले ब्याटिङ गर्दै शेरफान रदरफोर्डको आक्रामक ७६ रन मद्दतले १९६ रनको विशाल स्कोर खडा गरेको थियो ।
ओपनिङ ब्याट्सम्यान समेत रहेका कप्तान शाई होप ० र ब्रान्डोन किङ १ रन बनाएर आउट भएपछि वेस्ट इन्डिज दबाबमा परेको थियो ।
तर त्यसपछिका ब्याटरहरु शिमरोन हेटमाएरले २३, रोस्टोन चेजले ३४, रोभमन पावेलले १४ र जेसन होल्डरले ३३ रन बनाएर वेस्ट इन्डिजलाई जितको आधार तयार पारेका थिए ।
जितका लागि १९७ रनको लक्ष पछ्याएर मैदानमा उत्रेको इङल्यान्डले १९ ओभरमा अलआउट हुँदै १६६ रन मात्र बनाउन सक्यो । इङल्यान्डका लागि साम कुरानले सर्वाधिक ४३ रन बनाएका थिए । फिल साल्टले ३० र ज्याकोब बिथेलले ३३ रन बनाउनु बाहेक अन्य खेलाडीले खासै योगदान गर्न सकेनन् ।
वेस्ट इन्डिजका लागि गुडकेश मोटीले ३, रोस्टन चेजले २ तथा शमार जोसेफ, रोमारियो जोसेफ र अकिल हुसेनले एक एक विकेट लिए ।
यो जितसँगै समूह सी मा वेस्ट इन्डिजले लगातार दुई खेल जितेर ४ अंक बटुलेको छ । स्कटल्यान्ड र इङल्यान्डले एक एक खेल जितेर दुई दुई अंक जोडेका छन् । नेपाल र इटाली भने जितविहीन रहँदै ० अंक छ ।
यही समूहमा रहेको नेपालले आज इटालीको सामना गर्दैछ । यो खेल वान्खेडे रंगशालामा ३.१५ बजे सुरु हुनेछ ।
