काठमाडौँ। पञ्चायतकालीन राजनीतिक हस्ती तथा राष्ट्रिय प्रजातन्त्र पार्टी (राप्रपा) का वरिष्ठ नेता विश्वबन्धु थापाको ९८ वर्षको उमेरमा आज साँझ निधन भएको छ।
राप्रपाका वरिष्ठ नेता थापाको उपचारका क्रममा आज साँझ निधन भएको हाे।
२००७ सालदेखि पछिल्लो समयसम्मका राजनीतिक घटनाक्रमका साक्षी रहेको थापाको निधनले देशले एक इतिहास पुरुष गुमाएको र राप्रपाले आफ्नो अग्रज नेता गुमाएको प्रवक्ता मोहन श्रेष्ठले बताएका छन्। राप्रपा निर्माणमा स्वर्गीय थापाको योगदान सदैव आदरपूर्वक स्मरणीय रहने पनि उनले उल्लेख गरे ।
पञ्चायत व्यवस्था, बहुदलीय प्रजातन्त्र पुनःस्थापनापछिको संक्रमणकाल तथा पछिल्लो राजनीतिक परिवर्तनसम्मका घटनाक्रमका साक्षी रहेका थापा नेपाली राजनीतिक वृत्तमा अनुभव र स्पष्ट अभिव्यक्तिका लागि परिचित थिए।
