काठमाडौं । टी–२० विश्वकपको समूह चरणअन्तर्गत आजको खेलमा नेपाल वेस्ट इन्डिजसँग नौ विकेटले पराजित भएको छ । यससँगै लगातार तीन हार बेहोरेको नेपाल समुह चरणबाट बाहिरिएको छ । उता, लगातार तीन जित हात पारेको वेस्ट इन्डिज भने सुपर–८ मा पुगेको छ ।
यसअघि नेपालले दिएको १३४ रनको लक्ष्य पछ्याएको वेस्ट इन्डिजले १५.२ ओभरमा एक विकेट गुमाएर पुरा गर्यो । उसका लागि साइ होप ६१ र शिमरन हेटमायर ४६ रनमा नटआउट रहे । यस्तै, ओपनर ब्रान्डन किंगले २२ रन बनाए ।
बलिङ तर्फ नेपालका नन्दन यादवले एक विकेट लिए ।
यसअघि, मुम्बईस्थित वानखडे स्टेडियममा टस हारेर ब्याटिङको निम्तो पाएको नेपालले २० ओभरमा ८ विकेट गुमाएर १३३ रन बनाएको थियो । नेपालका लागि उपकप्तान दिपेन्द्र सिंह ऐरीले सर्वाधिक ५८ रन बनाएका थिए । उनले ४७ बलमा ३ चौका र ३ छक्का प्रहार गरे ।
दीपेन्द्र टी२० विश्वकपमा नेपालका लागि अर्धशतक बनाउने दोस्रो खेलाडी हुन् । यसअघि सन् २०१४ मा सुबास खकुरेलले हङकङ विरुद्ध अर्धशतक प्रहार गरेका थिए ।
यस्तै, सोमपाल कामीले १५ बलमा ४ चौका प्रहार गर्दै अविजित २६ रन बनाए । सातै विकेटका लागि दीपेन्द्र र सोमपालले ५४ रनको साझेदारी गरे । त्यसैगरी, लोकेश बमले १३, ओपनर आसिफ शेख र गुल्सन झाले समान ११ रन जोड्दा अन्य खेलाडीले दोहोरो अंकमा रन जोड्न सकेनन् ।
बलिङतर्फ वेस्ट इन्डिजका जेसन होल्डरले चार तथा अकिल हुसेन, म्याथ्यु फोर्डे, समर जोसेफ र रोस्टन चेजले एक–एक विकेट लिए ।
