काठमाडौं । केन्द्रीय सुरक्षा समितिको बैठकले निर्वाचन सुरक्षालाई थप सुदृढ र प्रभावकारी बनाउने निर्णय गरेको छ ।
गृहमन्त्री ओमप्रकाश अर्यालको संयोजकत्वमा शनिवार सिंहदरबारमा बसेको बैठकले यस्तो निर्णय गरेको गृह मन्त्रालयका सहसचिव एवं प्रवक्ता आनन्द काफ्लेले जानकारी दिनुभयो । उहाँकाअनुसार निर्वाचन प्रयोजनका लागि तयार पारिएको एकीकृत निर्वाचन सुरक्षा योजनाअनुसार सबै सुरक्षा निकायहरूले काम गरिरहेको र सोहीअनुसार कर्मचारी परिचालन तथा व्यवस्थापन भइरहेको ब्रिफिङ सुरक्षा निकायका प्रमुखहरूले बैठकमा गरेका थिए ।
बैठकले आगामी दिनमा पनि सुरक्षा व्यवस्था चुस्त राख्ने सहमति भएको उहाँले जानकारी दिनुभयो । उहाँले बैठकमा निर्वाचन अभियानका क्रममा विभिन्न स्थानमा राजनीतिक दलहरुबीच देखिउका विवाद र घटनाहरुको समिक्षा गरिएको जानकारी दिँदै गैरकानूनी कार्यमा संलग्न जोसुकैलाई कानूनी दायरामा ल्याउने निर्णय पनि भएको छ । सबै राजनीतिक दलहरुलाई नर्वाचन आचारसंहिताको पालना गर्न समेत बठकले आग्रह गरेको बताउनु भयो । यस्तै, बैठकले रौतहटमा भएको घटनाको सन्दर्भमा सबै पक्षलाई आपसी सद्भाव कायम गर्न आह्वान गरेको छ । साथै रौतहटको समग्र सुरक्षा व्यवस्था सुदृढ बनाउन सम्बन्धित सबै सुरक्षा संयन्त्रलाई आवश्यक निर्देशन दिइएको समेत काफ्लेले जानकारी दिनुभयो ।
उहाँले भन्नुभयो, ‘आजको केन्द्रीय सुरक्षा समितिको बैठकमा हामीले निर्वाचन सुरक्षाको बारेमा समिक्षा गर्यौँ । अन्य केही समसामयिक विषयमा पनि बैठकमा छलफल भयो । निर्वाचन प्रयोजनको लागि बनाइएको एकीकृत निर्वाचन सुरक्षा योजनाअनुसार नै सबै सुरक्षा निकायहरुले काम गरिरहेको र सोहीअनुसार कर्मचारीहरुको परिचालन तथा व्यवस्थापन भइरहेको भन्ने जानकारी प्राप्त भएको छ । योजनाअनुसार नै काम भइरहेको भन्ने विषयमास सुरक्षा निकायका प्रमुखहरुले बैठक ब्रिफिङ गर्नुभयो । भोलिको दिनमा पनि सुरक्षा व्यवस्थालाई चुस्त राख्नेगरी काम गर्ने सहमति भयो । त्यस्तै, राजनीतिक दलहरुबिच घरदैलो अभियानको क्रममा देखिएका घटना र विवादहरुको विषयमा पनि हामीले समिक्षा गर्यौँ । त्यस्ता गैरकानूनजी कार्यमा संलग्न कतिपय कानूनी दायरामा ल्याइसकेका छौँ । सबै राजनीतिक दलहरुलाई निर्वाचन आचारसंहिताको परिधिमा रही आफ्ना गतिविधि गर्न समेत अनुरोध गरिएको छ । गैरकानूनी कार्य गर्ने जोसुकैलाई कानूनी दायरामा ल्याउने पनि बैठकले निर्णय गरेको छ । सोही निर्णय देशका सबै जिल्ला सुरक्षा समितिहरुलाई निर्देशन दिने निर्णय पनि भएको छ । रौतहटको घटनाको सम्बन्धमा सबै पक्षलाई आपसी सद्भाव कायम गर्न जिल्ला सुरक्षा समितिबाट आह्वान गरेका छौँ । त्यस्तै जिल्लाका सबै सुरक्षा संयन्त्रहरुलाई जिल्लाको सुरक्षा व्यवस्था सुदृढ बनाउन पनि निर्देशन दिने निर्णय भएको छ ।’
देशभर सुरक्षा संवेदनशीलताका आधारमा जनशक्ति परिचालन गर्नेगरी सुरक्षा निकायहरुबीच सहमति भएको समेत प्रवक्ता काफ्लेले जानकारी दिनुभयो । –न्युज एजेन्सी नेपाल
