इङलिस प्रिमियर लिगमा शनिबार राति भएको खेलमा म्यान्चेस्टर सिटीले न्यूक्यासललाई २–१ गोल अन्तरले पराजित गरेर उपाधि होडलाई जीवितै राखेको छ ।
यो जितसँगै सिटीको २७ खेलबाट ५६ अंक पुगेको छ । समान खेल खेलेको आर्सनलले भने २ अंकको अग्रता सहित ५८ अंक छ ।
म्यान्चेस्टरको गृह मैदान एतिहाद रङ्गशालामा भएको खेलमा म्यान्चेस्टरका लागि निको ओराइलीले १४ र २७ मिनेटमा २ गोल गरेका थिए । न्यूक्यासलका तर्फबाट लेविस हलले २२औं मिनेटमा गोल गरेका थिए ।
दुबै टिमबाट निकै राम्रा मुभ बनाए पनि दोस्रो हाफ गोल रहित रहेको थियो ।
पछिल्ला पाँच खेलमा सिटीले चारमा जित र एकमा बराबरी गरेर उत्कृष्ट लयमा फर्किएको छ । आर्सनल भने दुई जित, दुई बराबरी र एकमा हार व्यहोरेर उपाधिका लागि संघर्षरत रहेको छ ।
उता, लिगमा उत्कृष्ट ४ का लागि संघर्षरत चेल्सी र एस्टन भिल्लाले बराबरी खेलेका छन् । पछिल्ला पाँच खेलमा चेल्सीले तीन वटामा विजयी र एकमा बराबरी गरेको छ ।
गएरातिको खेलमा चेल्सीका लागि जोआओ पेड्रोले पहिलो हाफको चौथो मिनेटमै बर्नली विरुद्ध गोल गरेर सुरुआती अग्रता दिलाएका थिए । तर खेल अन्तिम समयमा आएर तनाबपूर्ण बनेको थियो ।
लिगको अंक तालिकामा १९औं स्थानमा रहेको बर्नलीका लागि ९३औं मिनेटमा जियान फ्लेमिङले गोल गरेर चेल्सीलाई स्तब्ध पारेका थिए ।
चेल्सीका खेलाडी वेस्ली फोफानाले बर्नलीको डिबक्स बाहिर फल खेलेपछि रातो कार्ड पाएर मैदान छाड्नु परेको थियो । यो बराबरी पछि चेल्सीले ४५ अंकका साथ चौथो स्थानमा रहेको छ ।
त्यस्तै गएरातिको अर्को खेलमा एस्टन भिल्लाले लिड्स युनाइटेडसँग बराबरी खेल्दै अंक बाँडेको छ । यो बराबरीसँगै एस्टन भिल्ला ५१ अंक सहित तेस्रो स्थानमा छ ।
लिड्स युनाइटेडका एन्टोन स्टाचले ३१ औं मिनेटमा गोल गरेर टिमलाई अग्रता दिलाएका थिए तर ८८औं मिनेटमा भिल्लाका लागि टाम्मी अब्राहमले बराबरी गोल फर्काए ।
लिड्स भने ३१ अंक सहित लिगमा १५औं स्थानमा छ ।
