बलिउडमा एक समय निकै रुचाइएको जोडीका रूपमा अभिनेत्री रानी मुखर्जी र अभिनेता सेफ अली खानलाई लिने गरिन्थ्यो । ११ वर्षपछि पुनः यो जोडी पर्दामा फर्किने भएको छ । सन् २००५ मा प्रदर्शनमा आएको चलचित्र ‘बन्टी और बबली’ को सिक्वेल ‘बन्टी और बबली २’ मार्फत् उनीहरू पर्दामा एकसाथ देखिन लागेका हुन् । यशराज फिल्म्सले बनाउन लागेको यो चलचित्रमा सैफ र रानी सिनियर ठगको भूमिकामा देखिँदै छन् ।
‘बन्टी और बबली’ मा सैफले अभिनेता अभिषेक बच्चनलाई रिप्लेस गर्ने निर्माण पक्षले जनाएको छ । यो जोडीले सन् २००८ मा ‘थोडा प्यार थोडा मैजिक’ मा अभिनय गरेको थियो । वरुण शर्माले ‘बन्टी और बबली २’ को निर्देशन गर्दैछन् । यो चलचित्रलाई लिएर अभिनेत्री रानी र अभिनेता सैफ निकै उत्साहित भएको भारतीय सञ्चारमाध्यमले जनाएका छन् ।
यसमा अभिनेता अभिषेक पहिलो रोजाइमा भए पनि उनले चलचित्रमा काम गर्न अस्वीकार गरेपछि निर्माण पक्षले सैफलाई रानीको जोडीमा छानेको हो । यसैबीच सैफले चलचित्रमा जोडिन पाएकोमा खुसी व्यक्त गरेका छन् । उनले चलचित्रको स्क्रिप्ट सानदार भएकोले तुरुन्तै आफू अभिनय गर्न तयार भएको जिकिर गरे । उनले यो चलचित्र पूरै पारिवारिक हुने बताए । उनले फेरि एकपटक यशराजसँग जोडिन पाउँदा आफू निकै खुसी भएको बताएका छन् ।
