काठमाडाैँ । नेपाली काँग्रेसका सहमहामन्त्री उदय शमशेर राणाले पार्टी सभापति गगनकुमार थापाको राजीनामाबारे केन्द्रीय कार्यसमिति बैठकले आवश्यक निर्णय गर्ने बताएका छन्।
शुक्रबार कार्यसमितिको बैठकअघि पार्टी केन्द्रीय कार्यालय सानेपामा सञ्चारकर्मीसँग कुरा गर्दै सहमहामन्त्री राणाले सभापतिको राजीनामासम्बन्धी विषय विधानअनुसार केन्द्रीय समितिमा छलफल भएर मात्र निर्णय हुने स्पष्ट पारे। उनले अधिकांश नेता–कार्यकर्ताले अहिलेको राजनीतिक परिस्थितिमा पार्टीलाई गगन थापाको आवश्यकता रहेको धारणा राख्दै आएको पनि उल्लेख गरे।
उनका अनुसार बैठकमा प्रतिनिधिसभा निर्वाचन परिणामको प्रारम्भिक समीक्षा पनि गरिनेछ। यसका लागि सबै निर्वाचन क्षेत्रबाट उम्मेदवारहरूको रिपोर्ट माग गरिएको र ती रिपोर्ट प्राप्त भएपछि विस्तृत समीक्षा गर्ने तयारी भइरहेको उनले जानकारी दिए।
सहमहामन्त्री राणाले भने, “अहिले हामी निर्वाचन परिणामको प्रारम्भिक समीक्षा गर्छौं। हामीले उम्मेदवारहरूको रिपोर्ट मागिसकेका छौँ। रिपोर्ट आएपछि छिट्टै केन्द्रीय समितिको बैठक बसेर विस्तृत रूपमा समीक्षा गर्छौं। सभापतिको राजीनामाबारे केन्द्रीय समितिका साथीहरूले आफ्नो राय राख्नुपर्छ। विधानअनुसार पार्टी सभापतिको राजीनामा केन्द्रीय समितिमा पेश हुन्छ। अधिकांश नेता–कार्यकर्ताले अहिलेको परिस्थितिमा नेपाली काँग्रेसमा गगन थापाको आवश्यकता छ, त्यसैले उहाँले राजीनामा दिनुहुन्न भन्ने धारणा पहिलेदेखि नै आइरहेको छ।”
बैठकमा निर्वाचनको प्रारम्भिक समीक्षा र सभापति थापाले उपसभापति विश्वप्रकाश शर्मामार्फत बुझाउनुभएको राजीनामासम्बन्धी छलफल मुख्य एजेन्डा रहेको जनाइएको छ।
