काठमाडौँ । हिंसापीडित महिलाहरूका लागि न्याय सुनिश्चित गर्न माग गर्दै पीडित पक्षले राष्ट्रिय महिला आयोग परिसरमा नाराबाजी गरेका छन्।
‘महिला अधिकार सुनिश्चित गर्’, ‘महिला हिंसा अन्त्य गर्’, ‘महिला आयोग किन चुप् ?’, ‘इनिशा विक र रेश्मिका परियारलाई न्याय देऊ’, ‘छोरी चेलीको रक्षा गर्’ लगायतका नारासहित पीडित पक्षले विरोध प्रदर्शन गरेका हुन्।
सुर्खेतकी इनिशा विकको बलात्कारपछि हत्या भएको घटनाको शीघ्र छानबिन गरी दोषीलाई कारबाही गर्न तथा खोटाङकी रेश्मिका परियारमाथि भएको बलात्कारपछि हत्या प्रकरणमा संलग्न व्यक्तिलाई कानुनअनुसार कडा सजाय दिन पीडित परिवारले माग गरेका छन्।
यसअघि माइतीघर मण्डला मा धर्ना बस्दा समेत न्यायका लागि कुनै सुनुवाइ नभएको भन्दै उनीहरूले महिला आयोगको ध्यानाकर्षण गराएका हुन्।
पीडित पक्षको मागमा खोटाङ सेवा समाजले ऐक्यबद्धता जनाएको समाजका सचिव नवराज रोकाले जानकारी दिएका छन्। उनका अनुसार पीडितले छिटोभन्दा छिटो न्याय पाउनुपर्ने र दोषीमाथि कडाभन्दा कडा कारबाही हुनुपर्ने माग गरिएको छ।
