काठमाडौं। भदौ २३ र भदौ २४ गतेको घटनाको छानबिन गर्न बनेको जाँचबुझ आयोगका अध्यक्ष गौरीबहादुर कार्कीमाथि सुरक्षा खतरा बढेको भन्दै सुरक्षा संयन्त्रले सुरक्षित स्थानमा राख्नेगरी तयारी थालेको छ ।
कार्की आयोगका सिफारिसका आधारमा शनिबार प्रहरीले पूर्व प्रधानमन्त्री केपी शर्मा ओली र पूर्व गृहमन्त्री रमेश लेखकलाई पक्राउ गरेको थियो । त्यसयता नेकपा एमालेका नेताकार्यकर्ता आक्रोशित छन् । दिनभर काठमाडौंको स्थिति तनावग्रस्त रह्यो ।
यता, आयोगको अध्यक्ष कार्कीमाथि सुरक्षा जोखिम बढेको महशुस गरेर सरकारले उनलाई उचित सुरक्षाको प्रवन्ध गर्न लागेको छ । सुरक्षा निकायनिकट उच्चस्रोतकाअनुसार उनलाई नेपाली सेनाको ब्यारेकमा राख्ने तयारी गरिएको छ । कार्कीको निवास पनि भक्तपुरको गुण्डुमा छ । त्यहाँ पनि अहिले बाक्लो मात्रामा प्रहरी खटाईएको छ ।
