काठमाडौँ । नेकपा एमालेका नेता योगेश भट्टराईले पार्टीभित्र हाल देखिएको नेतृत्व चयन प्रक्रिया र आन्तरिक अवस्था प्रति असन्तुष्टि जनाएका छन्।
उनले सामाजिक सञ्जालमार्फत व्यक्त गरेको धारणा अनुसार पार्टी अहिले विभिन्न चुनौतीपूर्ण परिस्थितिबाट गुज्रिरहेको उल्लेख गर्दै व्यापक पुनर्गठन र एकताको आवश्यकता रहेको बताएका छन्।
भट्टराईका अनुसार हालैको निर्वाचन परिणामले पार्टीलाई गम्भीर धक्का पुगेको, नेतृत्वप्रति जनस्तरमा असन्तोष बढेको र पार्टी संगठनभित्र समेत व्यापक गुनासो देखिएको अवस्था रहेको छ। यस्तो परिस्थितिमा पार्टीलाई सुदृढ बनाउन पुनर्गठनमार्फत जनविश्वास पुनःस्थापना गर्नुपर्ने उनले जोड दिएका छन्।
उनले पार्टी संसदीय दलको नेता चयन गर्ने क्रममा अपनाइएको शैलीप्रति पनि आपत्ति जनाएका छन्। केही दिन समय लिएर पार्टी नेतृत्व र सांसदहरूबीच छलफल गरी साझा समझदारीमा पुग्न सकिने विकल्प हुँदाहुँदै सांसदहरूलाई दबाबमा राखेर निर्णय गरिएको जस्तो देखिएको भन्दै उनले यसले पार्टी पंक्तिमा थप चिन्ता बढाएको टिप्पणी गरेका छन्।
भट्टराईले आन्तरिक सहमति र उच्चस्तरीय छलफलमार्फत निर्णय गर्न सकेको भए राम्रो हुने उल्लेख गर्दै हालको प्रक्रिया उचित नभएको संकेत गरेका छन्। उनका अनुसार यस्ता निर्णयहरूले पार्टीभित्रको एकता र विश्वासमा असर पार्न सक्ने जोखिम रहन्छ।
योगेश भट्टराईले व्यक्त गरेको उक्त धारणा सार्वजनिक भएपछि एमालेभित्रको आन्तरिक छलफल र नेतृत्व शैलीबारे पुनः बहस सुरु भएको देखिन्छ।
