लण्डन क्लब चेल्सी च्याम्पियन्स लिग फुटबलको नकआउट चरणमा प्रवेश गरेको छ । मंगलबार राति भएको खेलमा फ्रेन्च क्लब लिलीलाई पराजित गर्दै चेल्सीले अन्तिम १६ मा स्थान पक्का गर्न सफल भएको हो । फ्रान्क लाम्पार्ड नेतृत्वको चेल्सीका टमी अब्राहम र सेजर अजपिलिकुएटाले पहिलो हाफमै दुई गोल गर्दै लण्डन क्लबको सम्भावना बलियो बनाएका थिए ।
विलियमको क्रसलाई सदुपयोग गर्दै १९ औ मिनेटमा अब्राहमले क्लोज रेन्जबाट चेल्सीलाई अग्रता दिलाएका थिए । अजपिलिकुएटाले ३५ औ मिनेटमा लण्डन क्लबको अग्रता दोब्बर बनाएका थिए । इमरसनको कर्नरलाई सदुपयोग गर्दै उनले हेडमार्फत गोल गरेका थिए । खेलको ७८ औ मिनेटमा रेमीले लिलीका लागि एक गोल फर्काएका थिए ।
चेल्सी ११ अक सहित दोस्रो स्थानमा रहेर समूह चरण पार गर्यो । शीर्ष स्थानको भ्यालेन्सिया समेत ११ अंक सहित नकआउट चरण पुग्यो । अजाक्स १० अंक सहित तेस्रो स्थानमा रहेर समूह चरणबाटै बाहिरियो । लिलीले अन्तिम खेलमा एक अंक बटुल्यो ।
