खोटाङ । विद्यालय तहमा अध्ययन गर्ने बालबालिकलाई देश र जनताप्रति जिम्मेवार, कामप्रति इमान्दार र अनुशासित बनाउने उद्देश्यले खोटाङका दुई विद्यालयमा राष्ट्रिय सेवा दल तालीम सञ्चालन भइरहेको छ । मुलुकमा भैपरी आउने विपद् व्यवस्थापनलगायतका काममा सघाउ पुर्याउने उद्देश्यका साथ नेपाल सरकारले विसं २०२२ बाट शुरु गरेको सो कार्यक्रमअन्तर्गत दिक्तेलस्थित सरस्वती मावि र पञ्च माविमा तालीमको आयोजना गरिएको हो ।
कक्षा–८ र ९ मा अध्ययनरत विद्यार्थी सहभागी गराएर सञ्चालन गरिएको तालीमको व्यवस्थापन खोटाङमा दिक्तेलस्थित नेपाली सेनाको गोरखनाथ गण मुडे ब्यारेकले मिलाएको छ । तालीममा दुवै विद्यालयका ३६/३६ छात्रछात्रा सहभागी छन् । तालीममा छात्रछात्राको चरित्र निर्माण गर्नु र उनीहरूमा भ्रातृत्व तथा एकताको भावना जागृत गरी आफ्नो काममा जिम्मेवारी लिने बानी बसाल्ने तथा प्राकृतिक प्रकोप तथा देशमा सङ्कट आइपरेमा सहयोग गर्ने विधिहरू सिकाइने जनाइएको छ । तालीममा सहभागी विद्यार्थीलाई ड्रिल, खुकुरी ड्रिल, एरोबिक्स, तेक्वान्दो, राष्ट्रभक्ति गीतमा नृत्य, भलिबल तथा फुटबल खेल आदि सिकाइने सरस्वती मावि तालीम केन्द्रका प्रशिक्षक नेपाली सेनाका हवल्दार आशिष गौतमले जानकारी दिनुभयो ।
युवा शक्तिलाई अनुशासित, कर्तव्यनिष्ठ र निष्ठावान बनाएर नेतृत्व विकास गर्दै दक्ष नागरिक बनाउने उद्देश्यले तालीमको आयोजना गरिएको मुडे ब्यारेकका गणपति प्रमुख सेनानी भोला पाण्डेले जानकारी दिनुभयो । “किशोरावस्थाका बालबालिका बढी कुलतमा फस्ने सम्भावना देखिन्छ”, उहाँले भन्नुभयो, “उनीहरुलाई सानैदेखि राष्ट्रियता, अनुशासन, एकताको भावना, आत्मविश्वास, नेतृत्व र क्षमता विकासलगायत व्यक्तित्व विकासमा सहयोग गर्न तालीमको आयोजना गरिएको हो ।”
राष्ट्रिय सेवा दलको कार्यक्रम शुरुदेखिनै नेपाली सेनाको प्रत्यक्ष निगरानी र प्राविधिक सहयोगमा सञ्चालन हुँदै आएको जनाइएको छ । यस कार्यक्रमबाट बढीभन्दा बढी युवापुस्ता लाभान्वित हुन सकून् भन्ने उद्देश्यले देशव्यापी रूपमा विस्तार गरिएको नेपाल सरकारले जनाएको छ ।
राष्ट्रिय सेवा दलमा भर्ना हुन कम्तीमा १४ वर्षदेखि बढीमा १६ वर्षसम्मका विद्यार्थी हुनुपर्ने जनाइएको छ । उचाइको हकमा छात्रको उचाइ पाँच फिट र छात्राको कम्तीम चार फिट १० इञ्च र तौल उमेरअनुसार हुनुपर्दछ । जिल्लामा गत असार १ गतेबाट शुरु भएको तालीम ७९ दिनको वार्षिक क्याम्प दिक्तेलमा तथा २१ दिनको सामूहिक क्याम्प पूर्वी राष्ट्रिय सेवा दल तालीम शिक्षालय याङ्शिला मोरङमा सञ्चालन हुने जनाइएको छ । राष्ट्रिय सेवा दलअन्तर्गत अहिले जुनियर डिभिजनका तालीम ७७ वटै जिल्लामा सञ्चालन भइरहेको छ ।
राष्ट्रिय सेवा दल तालीमले विद्यार्थीलाई अध्ययनमा रुचि तथा सामूहिक काममा एकजुट हुन थप ऊर्जा थपेको सरस्वती माविका समन्वय शिक्षक धनीराम राईले जानकारी दिनुभयो । चार वर्षदेखि लगातार खोटाङमा सञ्चालन हुँदै आएको उक्त कार्यक्रमअन्तर्गत गत वर्ष १५ वटा माविमध्ये सरस्वती मावि उत्कृष्ट बनेको थियो ।
विसं २०७२ मा दिक्तेलस्थित दिक्तेल इङ्ग्लिस बोर्डिङ स्कूलबाट शुरु गरिएको उक्त कार्यक्रमबाट हालसम्म २५२ छात्रछात्रा प्रशिक्षित भइसकेका छन् । तालीममा सहभागी तीन उत्कृष्ट छात्रछात्राले विदेश भ्रमणसमेत गरिसकेका छन् ।
दिक्तेल बोर्डिङ स्कूलका कञ्चन राई र सरस्वती माविका नञ्जु राईले श्रीलङ्का तथा पञ्च माविका रामजी आचार्यले भारत भ्रमण गर्नुभएको जनाइएको छ । राष्ट्रिय सेवा दल तालीम लिएका छात्रछात्राले जिल्लामा हुने सार्वजनिक कार्यक्रममा स्वयंसेवकको महत्वपूर्ण भूमिका निर्वाह गर्ने गरेको आयोजकले जनाएका छन् ।
