मिडफिल्डर एनगोलो कान्टे अजाक्सविरुद्वको खेलमा मैदान फर्कने चेल्सीका मुख्य प्रशिक्षक फ्याङ्क लाम्पार्डले बताएका छन् । प्रशिक्षक लाम्पार्डले आफ्ना स्टार मिडफिल्डर मंगलबार च्याम्पियन्स लिग अन्तर्गत अजाक्सविरुद्वको खेलमा मैदानमा देखिने बताएका हुन् । फ्रान्सका अन्तराष्ट्रिय खेलाडी पछिल्लो महिना मैदानमा देखिएका छैनन् । युरो छनोटको आईसल्याण्ड विरुद्वको खेल अगाडी वार्मअपको क्रममा उनी घाईते भएका थिए ।
जसकारण उनले चेल्सीको पाँच खेल समेत गुमाएका थिए । उनी मंगलबार अभ्यासमा फर्किएका छन् । र घरेलु मैदानमा डच च्याम्पियन अजाक्सलाई निमन्त्रणा गर्ने क्रममा उनी मैदान देखिने प्रशिक्षक लाम्पार्डको दाबी छ । उनी टोलीमा समावेश रहेका र चोट निको हुने क्रम जारी रहेको लाम्पार्डले बताएका छन् ।
चेल्सी प्रशिक्षकले एन्टोनियो रुडिगर टिममा फर्कने बिषयमा भने अनिश्चितता ब्यक्त गरे ।च्याम्पियन्स लिगको समुह एचमा रहेको चेल्सी र अजाक्सको समान ६ अंक रहेको छ । गोल अन्तरका आधारमा चेल्सी शीर्ष स्थानमा छ । तेस्रो स्थानको भ्यालेन्सियासंग २ अंकको अग्रता छ।
पछिल्लो खेलमा वाटफोर्डलाई लाम्पार्डको टिमले २–१ ले हराएको थियो । र प्रिमियर लिगको शीर्ष चारभित्र आफुलाई राख्न सफल पनि भएको छ । च्याम्पियन्स लिग लगत्तै चेल्सीले घरेलु मैदानमा प्रिमियर लिग अन्तर्गत क्रिस्टल प्यालेससंग खेल्नेछ ।
