काठमाडौं । सत्तारुढ नेपाल कम्युनिस्ट पार्टी (नेकपा)को सचिवालयले चयन गरेका प्रदेश प्रमुखवारे नेकपाकै नेताले आपत्ति जनाएका छन् । केन्द्रीय सदस्य विष्णु रिजालले प्रदेश प्रमुख नियुक्त गर्दा कर्णालीलाई छुट्याएको भन्दै असन्तुष्टि जनाएका छन्।
नेता रिजालले मेयरमा हारेकालाई पनि प्रदेश प्रमुखका सिफारिस गरेको दाबी गरेका छन्। नेकपाले प्रदेश प्रमुखमा सिफारिस गरेकामध्ये नेकपा अध्यक्ष केपी शर्मा ओलीको गृह जिल्ला झापाका विष्णु प्रसाई मेचीनगर नगरपालिकाको मेयरमा पराजित भएका थिए।
उनले यसैलाई इंगित गर्दै यस्तो कटाक्ष गरेका हुन्। ‘अन्त मेयर हारेकाको योग्यता पुग्दोरहेछ’, रिजालले भनेका छन्, ‘तर, कर्णालीकालाई योग्यता पुग्न केके चाहिने रहेछ ?’
यस अघि नेकपाका वरिष्ठ नेता माधव कुमार नेपालले पनि प्रदेश प्रमुखको छनौटमा विरोध गरेका थिए । नेता नेपाल नेकपाको विदेश विभागका प्रमुख हुन् भने रिजाल उप प्रमुख हुन ।
