काठमाडाैँ । नेपालको एक मात्र निजी अन्तर्राष्ट्रिय वायुसेवा कम्पनी हिमालय एअरलाइन्स्ले सन् २०२६ जुन ४ देखि काठमाडौँ र चीनको ‘सिलिकन भ्याली’ भनेर चिनिने शेन्जेनबीच ऐतिहासिक सिधा उडान सेवा सुरु गरेको छ।
कम्पनीले त्रिभुवन अन्तर्राष्ट्रिय विमानस्थल (काठमाडौँ) र शेन्जेन बाओ’आन अन्तर्राष्ट्रिय विमानस्थलबीच साप्ताहिक दुई सिधा उडान सञ्चालनमा ल्याएको हो। यो कदम नेपाल–चीन हवाई सम्पर्क विस्तार र नागरिक उड्डयन इतिहासमा एक महत्वपूर्ण उपलब्धि मानिएको छ।
उद्घाटन उडान (H9 985) काठमाडौँबाट जुन ४, २०२६ मा नेपाली समयअनुसार राति ९:५९ बजे ९८ यात्रु लिएर प्रस्थान गरेको थियो। उक्त उडान जुन ५ बिहान ४:१७ बजे स्थानीय समयअनुसार शेन्जेन बाओ’आन अन्तर्राष्ट्रिय विमानस्थलमा सुरक्षित रूपमा अवतरण भयो।
त्यसैगरी, शेन्जेन–काठमाडौँ उद्घाटन उडान (H9 986) जुन ५, २०२६ मा बिहान ६:१२ बजे १५७ यात्रु लिएर प्रस्थान गरी सोही दिन बिहान ८:२६ बजे काठमाडौँमा अवतरण गरेको थियो।
काठमाडौँ–शेन्जेन मार्गमा प्रत्येक मंगलबार र बिहीबार उडान सञ्चालन हुनेछ भने शेन्जेन–काठमाडौँ उडान प्रत्येक बुधबार र शुक्रबार सञ्चालन हुनेछ।
यो नयाँ सिधा सेवा सुरु भएपछि नेपाल र चीनबीचको हवाई सम्पर्क थप सुदृढ हुने, यात्रुहरूको पहुँच सहज हुने तथा पर्यटन र व्यापारिक अवसर विस्तार हुने अपेक्षा गरिएको छ।
हिमालय एअरलाइन्सले यात्रुहरूलाई सुरक्षित, सहज र गुणस्तरीय सेवा प्रदान गर्ने प्रतिबद्धता व्यक्त गरेको छ। यात्रुहरूले टिकट एअरलाइन्सका काउन्टर, आधिकारिक ट्राभल पार्टनर, वेबसाइट (www.himalaya-airlines.com) तथा मोबाइल एपमार्फत बुकिङ गर्न सक्नेछन्।
