काठमाडाैँ । प्रतिनिधिसभा बैठकमा प्रतिपक्षी दल श्रम संस्कृति पार्टीले प्रधानमन्त्री स्वयं उपस्थित भएर स्पष्टिकरण दिनुपर्ने माग गरेको छ ।
बैठकमा बोल्दै पार्टीका अध्यक्ष हर्कराज राईले प्रधानमन्त्रीका तर्फबाट अन्य मन्त्रीले जवाफ दिनु न्यायसंगत तथा संविधानसम्मत नहुने बताउनुभयो ।
उहाँले प्रधानमन्त्री पदलाई जिम्मेवार बनाउनु आवश्यक रहेको उल्लेख गर्दै प्रधानमन्त्री स्वयं उपस्थित हुन नसक्ने अवस्थामा आफ्नो धारणा लिखित रूपमा संसदमा पठाउनुपर्ने धारणा राख्नुभयो ।
“प्रधानमन्त्रीको तर्फबाट परराष्ट्रमन्त्रीले जवाफ दिनुहुन्छ भन्ने कुरा सुन्नमा आएको छ । यसमा हाम्रो सहमति छैन । प्रधानमन्त्री पदलाई जिम्मेवार बनाउने कुरा हो । हाम्रो माग अरू केही होइन । उहाँ यहाँ आउँदै नआउने र अरू कसैले स्पष्टिकरण दिने कुरा न्यायसंगत छैन, संविधानसम्मत पनि छैन । उहाँको आफ्नै धारणा के हो भन्ने कुरा संसदले सुन्न पाउनुपर्छ । यदि उहाँ बोल्न आउनुहुन्न भने लिखित रूपमा धारणा पठाउनुपर्छ । नत्र एउटाले गल्ती गर्ने र अर्कोले त्यसलाई सच्याउने अभ्यास स्वीकार्य हुँदैन,”उहाँले भन्नुभयाे ।
