काठमाडौं । नेपाल दूरसञ्चार प्राधिकरणले फिफा विश्वकप–२०२६ का खेलहरूको अनधिकृत अनलाइन प्रसारण रोक्न सबै मोबाइल तथा इन्टरनेट सेवा प्रदायकलाई निर्देशन दिएको छ।
प्राधिकरणको अनुमतिपत्र शर्त अनुगमन शाखाले जारी गरेको पत्रअनुसार विश्वकप–२०२६ को नेपालभित्रको विशेष तथा आधिकारिक प्रसारण अधिकार हिमालय टेलिभिजन नेटवर्कअन्तर्गतको हिमालय स्पोर्ट्स र डिसहोम डिजिटल प्रालिअन्तर्गतको डीगोको संयुक्त उपक्रम ‘एचटिभी–डिजिओ ब्रोडकास्टिङ कन्सोर्टियम जेभी’ले प्राप्त गरेको जनाएको छ।
सूचना तथा सञ्चार मन्त्रालयमार्फत प्राप्त जानकारीका आधारमा विभिन्न पाइरेटेड तथा अनधिकृत वेबसाइट र मोबाइल एपहरूले विश्वकपका खेलहरू नेपालमा निःशुल्क स्ट्रिमिङ गर्ने तयारी गरिरहेको सूचनापछि प्राधिकरणले यस्तो निर्देशन जारी गरेको हो।
प्राधिकरणले सेवा प्रदायकहरूलाई ती वेबसाइट तथा एपमार्फत विश्वकपका खेलहरूको अनधिकृत स्ट्रिमिङ हुन नदिने व्यवस्था मिलाउन र सोबारेको जानकारी प्राधिकरणलाई उपलब्ध गराउन अनुरोध गरेको छ।
प्राधिकरणले अनधिकृत प्रसारण गर्न सक्ने ३५ वटा वेबसाइट तथा एपहरूको सूचीसमेत सार्वजनिक गर्दै आवश्यक प्राविधिक अवरोध (ब्लक) गर्ने व्यवस्था मिलाउन सेवा प्रदायकहरूलाई निर्देशन दिएको छ।
