काठमाडाैँ । सिराहाको धनगढीमाई नगरपालिका–१३ स्थित असारीदेखि भालटार जोड्ने सडक निर्माण कार्य अन्तिम चरणमा पुगेर पनि करिव ३०० मिटर खण्डका कारण समग्र आयोजना नै अलपत्र परेको छ ।
लामो समयको प्रतीक्षापछि निर्माण भइरहेको उक्त सडकको सानो खण्ड अधुरो रहँदा पर्यटकीय र आर्थिक विकासको प्रक्रिया प्रभावित बनेको भन्दै स्थानीयवासी र सञ्चारकर्मीहरूले सम्बन्धित निकायको ध्यानाकर्षण गराएका छन् । स्थानीयकाअनुसार सडकको अधिकांश भाग निर्माण भइसके पनि अन्तिम चरणको थोरै दूरी नखुल्दा पूर्ण सञ्चालनमा बाधा पुगेको छ ।
यसबाट स्थानीय बासिन्दामा निराशा छाएको छ । धनगढीमाई नगरपालिकाका प्रमुख शिव शंकर महतोले नागरिकका माग र सञ्चारकर्मीहरूको सुझावलाई सकारात्मक रूपमा लिँदै आवश्यक पहल गर्ने आश्वासन दिनुभएको छ। नगर प्रमुखको यस तत्परतालाई स्थानीय तहमा सराहना गरिएको छ । केही दिनअघि पत्रकार विनोद मण्डलको नेतृत्वमा सो क्षेत्रको स्थलगत अवलोकन गरिएको थियो । अवलोकनका क्रममा पत्रकारहरूको टोलीले प्रश्तावित पार्क निर्माण स्थलमा प्रतिकात्मक रूपमा नेपाली झण्डा स्थापना गर्दै आयोजनालाई पूर्णता दिन माग गरेको थियो ।
नगरपालिकाको वडा नं. १३ र १४ मा पर्ने यो पहाडी क्षेत्र पर्यटकीय दृष्टिले निकै सम्भावनायुक्त मानिन्छ। असारीदेखि भालटारसम्मको सडक सञ्जाल व्यवस्थित भएमा प्रस्तावित पार्क निर्माणले गति लिने र यसबाट होटल व्यवसाय, आन्तरिक पर्यटन तथा स्थानीय आर्थिक गतिविधिमा उल्लेखनीय वृद्धि हुने अपेक्षा गरिएको छ ।
हाल सडक विस्तारको कार्य अन्तिम विन्दुमा पुगेको तस्बिरमा समेत देख्न सकिन्छ । बाँकी रहेको ३०० मिटर खण्ड पूरा भएमा समग्र परियोजना सफल हुनेमा स्थानीय विश्वस्त छन् । संयुक्त मिडिया हाउसले पनि नगरपालिकासँग समन्वय गरी यथाशिघ्र निर्माण कार्य सम्पन्न गर्न आग्रह गरेको छ । स्थानीय बासिन्दाहरूले ‘सानो दूरी, ठूलो उपलब्धि’ को मर्मलाई आत्मसात् गर्दै विकासको कार्यलाई अविलम्ब पूर्णता दिन सम्बन्धित पक्षसँग अपिल गरेका छन् ।
