काठमाडाैँ । राष्ट्रिय स्वतन्त्र पार्टीकी सांसद निशा डाँगीले झापाको मेचीनगरस्थित बाहुनडाँगीमा जंगली हात्तीले मच्चाएको वितण्डा र त्यसबाट भएको जनधनको क्षतिप्रति सरकारको ध्यानाकर्षण गराउनुभएको छ ।
सोमवार बसेको प्रतिनिधि सभाको बैठकमा आकस्मिक समय लिएर बोल्दै सांसद डाँगीले दशकौँदेखि जारी यो समस्या समाधानका लागि ठोस कदम चाल्न माग गर्नुभएको हो ।
सांसद डाँगीले आईतवार बिहान मेचीनगरस्थित बाहुनडाँगीमा आफ्नै घरबाहिर फूल टिप्ने क्रममा ६२ वर्षीय पद्म पौडेलले हात्तीको आक्रमणबाट ज्यान गुमाएको घटनाप्रति दुःख व्यक्त गर्नुभयो ।
उहाँले मृतकप्रति श्रद्धाञ्जली अर्पण गर्दै शोक सन्तप्त परिवारजनमा समवेदना समेत प्रकट गर्नुभयो । यस्तै, सोमवार बिहान मात्रै मेचीनगर–१ का किसानहरूको करिव ३ बिघा मकैबाली हात्तीले नष्ट गरिदिएको जानकारी उहाँले सदनलाई गराउनु भयो ।
उहाँले भन्नुभयो, ‘बाहुनडाँगीबासीका लागि हात्तीको त्रास नयाँ कुरा होइन, यो समस्या विगत ३५–४० वर्षदेखि निरन्तर छ । त्यहाँका नागरिकहरू बिहान खेतमा जाँदा, साँझ घर फर्कँदा र राति सुत्दा समेत हात्तीको आक्रमणमा परिने हो कि भन्ने डरमा बाँच्न बाध्य छन् ।’
उहाँकाअनुसार प्रत्येक साँझ भारतबाट ४० देखि ५० को हाराहारीमा हात्तीहरू नेपाल प्रवेश गर्ने र रातभरि वितण्डा मच्चाएर बिहान मात्र भारत फर्कने गरेका छन् । सदनमा बोल्दै उहाँले हात्तीको आक्रमणबाट ज्यान जानुका साथै वर्षभरिको पसिना बगाएर उब्जाएको धान, मकै र सुपारी लगायतका बाली एवं घरगोठ नष्ट हुँदा किसानहरूको महिनौँको मेहनत क्षणभरमै समाप्त हुने गरेको बताउनु भयो ।
यति ठूलो समस्या हुँदा पनि बाहुनडाँगीबासीले राज्यको उपस्थिति महशुस गर्न नपाएको उहाँको गुनासो थियो । सांसद डाँगीले सरकारसमक्ष विभिन्न मागहरू राख्दै बाहुनडाँगीलाई हात्तीको चरण क्षेत्र बनाएर अनुचित लाभ लिन सक्रिय व्यक्ति र त्यस्ता क्रियाकलापमा संलग्न संघ–संस्थाहरूमाथि तत्काल छानबिन गरी कारबाही गर्न माग गर्नुभयो । उहाँले जनताको जिउधनको सुरक्षाका लागि सरकारलाई संवेदशिल हुन समेत आग्रह गर्नुभएको छ ।
