काठमाडौं । राहदानी छपाइमा अनियमितता भएको प्रकरणमा अख्तियार दुरुपयोग अनुसन्धान आयोगले थप दुई जनालाई पक्राउ गरेको छ ।
पक्राउ पर्नेमा जर्मनी कम्पनी मुहलबाउरका नेपाली प्रतिनिधि मनिन्द्रराज मल्ल र राहदानी विभागका तत्कालीन लेखा अधिकृत तुलसीप्रसाद आचार्य रहेका छन् । उनीहरूलाई नियन्त्रणमा लिएर अनुसन्धान अघि बढाइएको अख्तियार स्रोतले जनाएको छ ।
उनीहरूविरुद्ध ३ दिनको म्याद थप गरिसकिएको छ ।
यसअघि सोही प्रकरणमा अख्तियारले राहदानी विभागका तत्कालीन महानिर्देशक तिर्थराज अर्याल र निर्देशक सुनील कुमार केसीलाई पनि पक्राउ गरिसकेको थियो । उनीहरूको हकमा ४ दिनको म्याद थप गरी अनुसन्धान भइरहेको छ ।
प्रकरणसँग सम्बन्धित व्यक्तिहरूको संख्या बढेसँगै अनुसन्धान थप गहिरिँदै गएको देखिएको छ ।
