काठमाडौँ । कानून, न्याय तथा संसदीय मामिलामन्त्री सोविता गौतमले संसदको गरिमा र औचित्य कायम राख्न सांसदहरूले आफ्नो व्यवहार, भाषा र पोशाकमा विशेष ध्यान दिनुपर्ने बताउनुभएको छ ।
६८औँ संसद दिवसको अवसरमा मंगलबार सिंहदरबारमा आयोजित कार्यक्रममा बोल्दै उहाँले संसदलाई जनताको सर्वोच्च संस्थाका रूपमा स्थापित गर्न सांसदहरू स्वयं मर्यादित हुनुपर्नेमा जोड दिनुभयो ।
मन्त्री गौतमले पछिल्लो समय संसदको गुणस्तर खस्किँदै गएको भन्ने जनगुनासोप्रति आत्मसमीक्षा गर्नुपर्ने आवश्यकता औँल्याउनुभयो । उहाँका अनुसार संसदीय अभ्यासलाई उपलब्धिमूलक बनाउन जनताका मुद्दालाई केन्द्रमा राखेर बहस गर्न आवश्यक छ ।
प्रक्रियागत र प्राविधिक विषयहरू कार्यव्यवस्था परामर्श समिति वा अन्य अनौपचारिक छलफलमार्फत टुङ्ग्याउन सकिने भन्दै उहाँले संसदको समय जनसरोकारका विषयमा मात्र खर्चिनुपर्ने बताउनुभयो ।
“जनताले तिरेको करबाट राज्यकोष सञ्चालन हुन्छ र त्यही कोषबाट संसदको खर्च चल्छ,” उहाँले भन्नुभयो, “त्यसैले सांसदहरूले प्राप्त गरेको एक मिनेट समय पनि जनताका मुद्दामाथि बहस गर्नमै केन्द्रित गर्नुपर्छ ।”
उहाँले शिक्षा, स्वास्थ्य, रोजगारी, सेवा प्रवाह र जनताका अन्य समस्याको समाधानका विषयमा सरकारलाई जवाफदेही बनाउने गरी व्यापक बहस हुनुपर्ने बताउनुभयो ।
मन्त्री गौतमले संसदको गुणस्तर खस्किनुको कारणबारे सांसदहरूले स्वयं मनन गर्नुपर्ने उल्लेख गर्दै संसदमा प्रयोग हुने भाषा, उच्चारण गरिने शब्द र पोशाकदेखि लिएर हरेक कुरामा मर्यादा आवश्यक रहेको बताउनुभयो ।
“यदि हामी संसदको मान राख्छौँ भने त्यो मर्यादा आफ्नै व्यवहारबाट कायम गर्नुपर्छ,” उहाँले भन्नुभयो, “त्यसरी नै संसद मर्यादित र यसको गरिमा उच्च रहेको पुष्टि हुन्छ ।”
उहाँले संसद जनताको सर्वोच्च थलो भएकाले यस संस्थाको गरिमा जोगाउने दायित्व सांसदहरूको आचरणबाट देखिनुपर्ने बताउनुभयो । साथै, संसदको मर्यादा कायम राख्न आफू व्यक्तिगत रूपमा शतप्रतिशत प्रयत्नशील रहने प्रतिबद्धता समेत व्यक्त गर्नुभयो ।
