काठमाडौँ — नेपाली काँग्रेस यतिखेर जागरण अभियानमा देशव्यापी कार्यक्रममा छ । पार्टीका शीर्ष तहका नेताहरू भातृसंस्था समेतकाे सहभागितामा विभिन्न कार्यक्रम लिएर शहर बजार र गाउँ तहसम्म पुग्दैछ ।
तर नेकाकै प्रभावशाली मानिएकाे तरूणहरूकाे संस्था नेपाल तरूण दल भने राजधानीमा जुहारी खेल्नमै व्यस्त छ । आन्दोलनको मुद्दामा भ्रष्टाचारको विषय समेट्ने कि नसमेट्ने विषयमा अध्यक्ष जितजंग बस्नेत र महासचिव भुपेन्द्रजंग शाहीबीचको झगडाले चर्को रुप लिएको छ।
उनीहरुबीचको विवाद विवादमै मात्र सीमित नरही एकले अर्कालाई पदबाट हटाएर कारबाही गरेको विज्ञप्ति निकाल्ने स्थितिसम्म पुगेको छ ।
अध्यक्ष बस्नेतले अनुशासनहीन कार्य गरेको भन्दै महसचिव शाहीलाई पदबाट हटाइएको जनाएका छन्। तरुण दलको विधानको परिच्छेद १० को धारा ४४ को व्यवस्थाअनुसार तरुण दलको महासचिवसहित कुनै पनि सदस्य नरहेको गरी शाहीलाई हटाइएको बस्नेतले जारी पत्रमा उल्लेख छ।
अध्यक्षको पत्रमाथि विमती राख्दै महसचिव शाहीले अर्काे विज्ञप्ति निकालेर अध्यक्ष बस्नेतलाई नै पदबाट हटाएको जनाएका छन्। शाहीले अध्यक्ष बस्नेतलाइ १ वर्षका लागि तरुण दलको साधरण सदस्यसमेत नरहने गरी कारबाही एवं निष्काशित गरिएको जनाएका छन्।
पछिल्लो समय यी दुई नेताहरुबीच भ्रष्टाचारका मुद्दालाई आन्दोलनको विषय बनाउने कि नबनाउने भन्नेमा विवाद चर्कंदै आएपछि यी विवाद सुरु भएको हो।
