काठमाडौं । भ्रमण वर्ष २०२० लाई लक्षित गर्दै त्रिदेशीय ट्राभल शो नेपालमा आयोजना हुने भएको छ । नेपाल–इण्डिया–चाइना एक्सो (नाइस) आयोजनामा झण्डै १ हजार विदेशी पाहुनालाई नेपाल ल्याएर कार्यक्रम आयोजना गर्न लागिएको बुधबार राजधानीमा आयोजित कार्यक्रममा जानकारी गराइयो ।
नेपाल च्याप्टरले आयोजना गर्न लागेको यो कार्यक्रम पाटा नेपाल भ्रमण वर्षको सचिवालय र नेपाल पर्यटन बोर्डको समन्वयमा हुने भएको छ । नेपालको सबैभन्दा ठूलो स्रोत बजारका रुपमा रहेका दुई मुलुकबाट बढी भन्दा बढी पर्यटक भित्राउने उद्देश्य लिई सो एक्स्पो आयोजना भएको भ्रमण वर्ष संयोजक सुरज वैद्यले बताएका छन् ।
एक्स्पोमा नेपाल, भारत र चीनका एयरलाइन्स, होटेल/रिसोर्ट, पर्यटक यातायात, ट्राभल, टूर, बैंक तथा वित्तीय संस्थालगायत पर्यटनसँग सम्बन्धित कम्पनीहरुको सहभागिता हुने पाटा नेपाल च्याप्टरका अध्यक्ष सुनिल शाक्यले जानकारी दिए ।
एक्स्पो २१ देखि २४ फेब्रुअरीमा आयोजना हुने बताईएको छ । त्यसअगाडी नै नेपाल आएका पाहुनालाई विभिन्न गन्तब्यसम्म पुर्याई पर्यटन प्रवद्र्धन गर्ने योजना आयोजकको रहेको छ ।
