काठमाडौं । नेपाली कांग्रेसका उपसभापति विमलेन्द्र निधिले नेपाल अब पुनः हिन्दु राष्ट्र हुन नसक्ने बताएका छन्।
राष्ट्रिय जागरण अभियान घोषणा कार्यक्रममा बिहीबार पार्टी केन्द्रीय कार्यालय सानेपामा आयोजित पत्रकार सम्मेलनमा उपसभापति निधिले कांग्रेस हिन्दु राष्ट्रको पक्षमा नभएको प्रष्ट पारे।
‘संविधानले धर्म निरपेक्षता भनेको छ। संविधान बनाउने नेतृत्व नेपाली कांग्रेसले गरेको हो,’ उनले भने, ‘राज्य धर्म निरपेक्ष छ। कांग्रेसलाई धर्म निरपेक्षता स्वीकार्य छ। हाम्रो चारतारे झण्डामा धार्मिक स्वतन्त्रता छ त्यो भनेको धर्मनिरपेक्षता हो।’
उपसभापति निधिले हिन्दु राज्य बनाउने कुरा कांग्रेसलाई स्वीकार्य नहुने पनि बताए। उनले थपे, ‘जहाँसम्म हिन्दु राज्यको कुरा छ, राज्यलाई हिन्दु राज्य नामाकरण गर्नुपर्छ भन्ने पक्षमा कांग्रेस छैन फाइनल कुरा यही हो।’
