काठमाडौं । हङ्कङमा जारी प्रर्दशनका कारण मेट्रो स्टेशनहरू आइतवार बन्द भएका छन् । प्रहरीले एउटा मेट्रो स्टेशनमा प्रवेश गरेर धरपकड गरेको र पिरो वस्तु छरिदिएपछि स्टेशनहरू बन्द गरिएको हो ।
उक्त बस्तुबाट ३१ जना घाइते भएका छन् । हाल १८ जना अस्पतालबाट घर फर्काइएका छन् भने थप आठजनाको अवस्था स्थिर रहेको बताइएको छ।
प्रदर्शनमा उत्रिएका दशौँ हजार मानिसलाई हङ्कङको दङ्गा प्रहरीले अश्रुग्यास, रबरको गोली र पानीको फोहोरा प्रयोग गरेको थियो।तर हङ्कङका अधिकारीहरूले कानुनी शासन कायम गराउने बताएका छन् र मानिसहरूलाई हिंसा अस्वीकार गर्न आग्रह गरेका छन्।
चिनियाँ राज्य सञ्चालित सञ्चार माध्यमले उक्त भूभाग नियन्त्रण बाहिर जाने खतरा बढेको भन्दै कानुन स्थापित गरिनुपर्ने समय आएको बताएका छन्।
अपराधमा सन्दिग्धहरूलाई मुद्दा चलाउन मुख्यभूमि चीन लग्न मिल्ने किसिमको सुपुर्दगी विधेयक आएपछि सुरु भएको आन्दोलन विधेयक स्थगित भएपछि पनि निरन्तर चलिरहेको छ।
