काठमाडौं । मंगलबार करिब ५ अंक बढेर लगानीकर्ताहरूलाई बजार बढ्ने आशा देखाएको नेप्सेले बुधबार पुनः निराश बनाएको छ । नेप्से परिसूचक यस दिन १ हजार २ सय बिन्दुभन्दा तल पुगेको छ । यस दिन नेप्से शून्य दशमलव ८५ प्रतिशत घटेर बन्द भएको छ । यसअघि गत वैशाख २ गते नेप्से १ हजार २ सय बिन्दुभन्दा तल रहेको थियो । सूचीकृत कम्पनीहरूले लाभांश घोषणा गरिरहँदा पनि नेप्से ओरालो लागेपछि लगानीकर्ता अन्योलमा परेका छन् ।
लाभांश संकलन गर्ने समयमा बजारमा सस्तो सेयर खरिद गर्ने मौका हुँदा पनि बजार बढ्न सकेको छैन । लगानीकर्तालाई अहिले पुँजीगत लाभकर गणना विवादले नै निरुत्साहित बनाइरहेको एक ब्रोकरले बताए । सो विवाद समाधान नभएसम्म बजारले गति नलिने उनको भनाइ छ । बजारमा अहिले खरिदकर्ताको तुलनामा बिक्रीकर्ताहरू बढी देखिन्छन् । निराश र त्रसित लगानीकर्ताले सस्तोमा सेयर बिक्री गरेका कारण बजार ओरालो लागेको एक लगानीकर्ताले बताए ।
बजार सारांश स् नेप्से परिसूचक बुधबार १० दशमलव २६ अंक घटेर १ हजार १ सय ९७ दशमलव ७५ बिन्दुमा पुगेको छ । सेन्सेटिभ इन्डेक्स यस दिन १ दशमलव ९९ अंक घटेर २ सय ६१ दशमलव ४० बिन्दुमा पुगेको छ । त्यसैगरी, फ्लोट इन्डेक्स यस दिन शून्य दशमलव ७८ अंक र सेन्सेटिभ फ्लोट इन्डेक्स शून्य दशमलव ६५ अंक घटेको छ । यस दिन १ सय ६८ कम्पनीको ५ हजार ४ सय ९० पटकको कारोबारमा ३७ करोड २४ लाख १७ हजार ६ सय ३७ रुपैयाँबराबरको १३ लाख २१ हजार ४ सय ८६ कित्ता सेयर खरिद–बिक्री भएको छ ।
प्राविधिक विश्लेषण
आरएसआई स् नेप्सेको १४ दिने आरएसआई यस दिन २६ दशमलव ९१ स्केलमा पुगेको छ । ओभरसोल्ड जोनमा रहेको यस आरएसआईले बजारमा सेयर खरिदचापको तुलनामा बिक्री चाप बढी रहेको संकेत गर्छ ।
एडी रेसियो स् नेप्सेको एडी रेसियो यस दिन शून्य दशमलव २१ रहेको छ । यसले बजार बियरिस प्रवृत्तिमा रहेको संकेत गर्छ । यस दिन कारोबारमा आएका १ सय ६८ कम्पनीमध्ये २४ कम्पनीको मात्र सेयरमूल्य बढेको छ भने १ सय २० कम्पनीको सेयरमूल्य घटेको छ । बाँकी २२ कम्पनीको सेयरमूल्य यस दिन स्थिर रहेको छ ।
यस दिनको पिभट विश्लेषण गर्दा बिहीबार नेप्से ओरालो लागे १ हजार १ सय ९१ दशमलव ९७ बिन्दुमा पहिलो टेवा पाउने देखिन्छ भने उकालो लागे १ हजार २ सय ८ दशमलव ५० बिन्दुमा पहिलो प्रतिरोधको सामना गर्नेछ । त्यसैगरी, नेप्सेले १ हजार १ सय ८६ दशमलव १९ बिन्दुमा दोस्रो टेवा पाउने देखिन्छ । पहिलो प्रतिरोध बिन्दु तोडेर उकालो लागे नेप्सेले १ हजार २ सय १९ दशमलव २५ बिन्दुमा दोस्रो प्रतिरोधको सामना गर्नेछ । यस दिन नेप्सेको पिभट बिन्दु १ हजार २ सय २ दशमलव ७२ रहेको छ ।
सर्वाधिक कारोबार हुनेमा आरएमडिसीको संस्थापक सेयर
यस दिन कारोबार रकम र सेयर संख्याका आधारमा रुरल माइक्रोफाइनान्स डेभलपमेन्ट सेन्टर लिमिटेडको संस्थापक सेयर अगाडि रहेको छ । सो लघुवित्त कम्पनीको यस दिन १० करोड ५४ लाख ६६ हजार रुपैयाँबराबरको ३ लाख २३ हजार ५ सय २५ कित्ता सेयर खरिद–बिक्री भएको छ । कुमारी बैंकको यस दिन २ सय ८४ पटकको कारोबारमा ३ करोड ५० लाख २० हजार रुपैयाँबराबरको १ लाख ७२ हजार ४ सय ५३ कित्ता सेयर किनबेच भएको छ । एनआइसी एसियाको यस दिन ३ सय ६७ पटकको कारोबारमा ३ करोड २० लाख ९४ रुपैयाँबराबरको ७२ हजार ६ सय ८५ कित्ता सेयर खरिद–बिक्री भएको छ । यी दुवै कम्पनीले यस दिन लाभांश घोषणा गरेका कारण लगानीकर्ताहरू आकर्षित भएका हुन् ।
त्यसैगरी, प्रभु बैंकको यस दिन १ करोडभन्दा बढीको सेयर खरिद–बिक्री भएको छ । कारोबार संख्याका आधारमा यस दिन पनि सान्जेन जलविद्युत् कम्पनी पहिलो स्थानमा रहेको छ भने रसुवागढी हाइड्रोपावर दोस्रो स्थानमा रहेको छ । सान्जेनको यस दिन ४ सय ७८ पटक र रसुवागढीको ४ सय ६५ पटक सेयर किनबेच भएको छ ।
सबैको लघुवित्तको सेयरमूल्यमा सकारात्मक सर्किट
नेप्से ओरालो लागे पनि यस दिन कारोबारमा आएको सबैको लघुवित्त वित्तीय संस्था लिमिटेडको सेयरमूल्य १० प्रतिशत बढेर सकारात्मक सर्किट लागेको छ । सो कम्पनीको सेयरमूल्य यस दिन ३६ रुपैयाँ बढेर ४ सय १ रुपैयाँमा अन्तिम कारोबार भएको छ । त्यसैगरी, आँधीखोला लघुवित्त वित्तीय संस्थाको सेयरमूल्य यस दिन ४ प्रतिशत र हिमालयन पावर पार्टनरको ३ दशमलव ३८ प्रतिशत बढेको छ । अन्य कम्पनीहरूको सेयरमूलय वृद्धिदर भने ३ प्रतिशतभन्दा कम रहेको छ । दिव्यश्वरी हाइड्रोपावर लिमिटेडको सेयरमूल्य यस दिन ४ दशमलव ९१ प्रतिशत घटेको छ । कारोबारमा आएका सामुदायिक लघुवित्त वित्तीय संस्था, हिमालयन डिस्टिलरी, नेसनल हाइड्रोपावर कम्पनी, रसुवागढी हाइड्रोपावर र आँखुखोला जलविद्युत् कम्पनीको सेयरमूल्य यस दिन ३ प्रतिशतभन्दा बढी घटेको छ ।
सबै समूहका परिसूचक घट्यो
यस दिन कारोबारमा आएका ११ वटै समूहको परिसूचक घटेर रातो भएको छ । जलविद्युत् समूहको परिसूचक यस दिन सर्वाधिक १ दशमलव ४ प्रतिशत घटेको छ । अन्य समूहको परिसूचक यस दिन १ दशमलव शून्य २ प्रतिशत, जीवन बिमा समूहको १ दशमलव शून्य २ प्रतिशत, वाणिज्य बैंक समूहको शून्य दशमलव ८७ प्रतिशत, निर्जीवन बिमा समूहको शून्य दशमलव ८० प्रतिशत र लघुवित्त समूहको शून्य दशमलव ६१ प्रतिशत घटेको छ ।
त्यसैगरी, उत्पादनमूलक समूहको परिसूचक शून्य दशमलव ५१ प्रतिशत, विकास बैंक समूहको शून्य दशमलव ३९ प्रतिशत, वित्त समूहको शून्य दशमलव ३१ प्रतिशत, म्युचुअल फन्ड समूहको शून्य दशमलव २८ प्रतिशत र होटेल समूहको शून्य दशमलव शून्य ६ प्रतिशत घटेको छ ।, समाचार नयाँ पत्रिका दैनिकमा प्रकाशित छ ।
