अमेरिकाका पूर्व राष्ट्रपति बाराक ओबामा र उनकी पत्नी मिसेल ओबामाले हलिउडमा डेब्यू गरेका छन् । वृत्तचित्र ‘अमेरिकन फ्याक्ट्री’ मार्फत उनीहरुले हलिउडमा डेब्यू गरेको रोयटर्सले जनाएको छ ।
जनरल मोटर्सको प्लान्ट रहेको ठाउँमा चिनिया कम्पनी स्थापना भएको र त्यसपछिका घटनाक्रम समेटिएको वृत्तचित्र नेटफ्लिक्स र हाइअर ग्राउण्डले उत्पादन गरेको हो ।
वृत्तचित्रमा सन् २००८ को आर्थिक मन्दीका क्रममा ओहायोमा रहेको मोराइनमा अटो क्षेत्रबाट पलायन भएका कामदारको कथा छ । जुन कामदारलाई ६ वर्षपछि चिनियाँ कम्पनी फुयायो ग्लासले फेरि काममा राखेको थियो । मानिसहरुले अरु कसैको जीवनलाई नजिकबाटै हेरुन र बुझुन भन्ने आफूहरुले चाहेको पनि बाराक ओबामाले बताए ।
‘एउटा राम्रो कथाले कसैको जीवन राम्रोसँग बुझ्ने अवसर प्रदान गर्दछ । यसले तपाईँलाई साझा ठाउँ भेट्टाउन समेत सहयोग पुर्याउनेछ । त्यसैले मिसेल र म हाइअर ग्राउण्डमार्फत पहिलो फिल्म ल्याएका हौँ’, अमेरिकी पूर्व राष्ट्रपति ओबामाले बुधबार ट्वीट गरेका छन् ।
मिसेल ओबामाले फिल्मको सुरुको कारखानामा काम गरिरहका कामदारको दृश्यले आफूलाई निकै तानेको बताइन् । उनले आफ्नो र आफ्ना बुवाको पृष्ठभूमि पनि त्यही भएको बताइन् । वृत्तचित्र जुलिया रिचर्ट र स्टेभन बोग्नारले बनाएका हुन् ।
