सञ्चारकर्मी भीषण राईले डेब्यु निर्देशन गरेको फिल्म ‘पुरानो बुलेट’ दर्शकहरुले खुलेर प्रशंसा गरेका छन् । धरानको गोर्खा सिनेप्लेक्समा शनिबार प्रदर्शन गरिएको च्यारिटी शोमा मुख्य पात्र अनुपविक्रम शाही, वर्षा शिवाकोटी र माला लिम्बूको अभिनयलाई दर्शकले बढी रुचाएका हुन् ।
पूर्वको लवजलाई समावेश गर्दै समसामयिक विषयवस्तुलाई उठाएको दर्शकले प्रतिक्रिया दिए । अधिकांश छायांकन मोरङको लेटाङमा गरिएको थियो । फिल्ममा बालसखा हुँदैखेरि मन पराउँदै आएकी गाउँले परिवेशकी वर्षा शिवाकोटी र अनुपबीचको सम्बन्ध दोहोरो प्रेममा परिणत हुन नपाउँदै बोल्ड युवतीका रूपमा माला लिम्बूको इन्ट्रीपछि दर्शकले इन्डिङ कस्तो होला भन्ने अनुमान गर्न सक्दैनन् ।
कतिपय सिनमा दर्शक रोएका पनि थिए ।पुरानो बुलेटले लाखौं युवा वैदेशिक रोजगारमा गइरहेको सन्दर्भमा स्वदेशमै पनि काम गरेर विश्वास आर्जन गर्न सके बाँच्न सकिन्छ भन्ने सन्देश दिएको छ ।
फिल्ममा नायिका वर्षालाई अमेरिका जाने डीभी परेपछि काठमाडौं पुगेर पनि गाउँमै फर्किनुले स्वदेश बनाउनलाई युवाको खाँचो रहेको प्रस्ट हुन्छ । कथा, पटकथा, छायांकनमा चलेका स्टार भए पनि हलमा लामो समय टिक्न भने सकेको छैन । ‘दर्शक सबैले फिल्म राम्रो लाग्यो भनेका छन्।
फिल्म क्रिटिकहरूले पनि राम्रो फिल्म बनेको भन्छन्,’ । निर्देशक भीषण राईले भने, ‘तर हल मालिकको एकाधिकार र सिन्डिकेटको मारमा परियो । च्यारिटी शो गरेर भए पनि १ करोड लगानी करिब करिब उठाउन सफल भइएको छ ।’
उनले च्यारिटीबाट संकलित रकमको केही प्रतिशत सामाजिक सेवामा प्रयोग गर्ने निर्देशक राईले सुनाए । दर्शक बनेर आएका शिक्षक विजय अछामीले भने, ‘डेब्यु निर्देशकले यति राम्रो बनाउन सक्छन् भने अरू मेहनत गर्दा झन् राम्रो फिल्म भीषण राईले दर्शकलाई दिन सक्ने सम्भावना देखियो ।’
