नायिका शिल्पा पोखरेलले आफ्ना श्रीमान् छविराज ओझाविरुद्ध असुरक्षा भएको भन्दै प्रहरीमा उजुरी दिएकी थिइन् ।
ओझा र पोखरेलबीच पछिल्लो समय खटपट भएको थियो । ओझाले पोखरेललाई केही समयदेखि कुटपिट गरिरहेका थिए । ओझाले कुटपिट गरेपछि पोखरेल आफन्तको घरमा गएर बस्न थालेकी थिइन् ।छबिले शिल्पा कसैको निर्देशनमा आफूविरुद्ध लागेको आरोप लगाएका छन् । ‘मेरो चरित्र पूरै चलचित्रकर्मी र चलचित्र उद्योगलाई थाहा छ । कानको जाली फुट्नु त के एक थप्पड समेत हानेको छैन’, उनले भने ।
ओझाले आफूले कुनै हिंसा नगरेको दाबी गरे । ‘हाम्रो ७३ सालमा बिहे भएको थियो र ६ महिना अघिमात्र बिहे दर्ता भएको थियो’ ओझाले भने, ‘ सामान्य विवादमा गत असार ८ गतेदेखि घरबाट निस्केर हिँडेकी थिइन् । अहिले उजुरी गरेको कुराले अचम्म लागेको छ ।’
स्रोतका अनुसार, पोखरेलले ओझासँग डिभोर्स मागेकी छन् । दुईले गोप्य रुपमा समस्या सुल्ट्याउन चाहेका छन् ।पोखरेल ओझाको चौथो श्रीमती बनेर ओझा निवास भित्रिएकी थिइन् । ओझा र पोखरेलले २०७३ सालको दशैंमा काठमाडौंको गोकर्ण रिसोर्टमा सुटुक्क लगनगाँठो कसेका थिए । लामो समय उनीहरुले आफ्नो बिबाहलाई लुकाए । तर, गत वर्ष मात्र निर्माता छविराज ओझाले आफूहरुले बिबाह गरिसकेको बताएका थिए ।
डिभोर्स नजिक पुगेका उनीहरु एक अर्कालाई उदाङ्गो बनाउन लागिपरेका छन् । एकले अर्कालाई दोष थोपरेर ३ बर्षको अन्तरालमा घर भित्र भएका गोप्य कुरा समेत मिडियामा सार्वजनिक भैरहेका छन् । यसैविच, शिल्पाले डिभोर्सका लागि फाइल गरिसकेको बताएपछि निर्माता छविराज ओझाले फेसबुकमा पत्र लेख्दै उनलाई मिल्नका लागि आग्रह गरेका छन् ।
छविले लेखेका छन्–‘मैले ५२ बर्षको उमेरमा ३ जना श्रीमतीसँग सम्बन्ध विच्छेद भैसकेपछि तपाईसँग जीन्दगी बिताउन सक्छु होला भनेर जिन्दगीका सबै कुरा संझौता गरेर बिहे गरेकी श्रीमती हो तपाई । छातीमा हात राखेर आज एकछिनलाई आफैलाइ नढाटी संझनुहोस् तपाइले लगाएका आरोपहरु कती सत्य छन् ? यदि, तपाई पनि आफूलाई सच्याएर अझै मेरो श्रीमती, तपाइले बिहे गर्ने बेलामा आश्वासन दिलाए जस्तै वुढेसकालको साहरा बन्न सक्नुहुन्छ भने म पनि मेरा कमजोरीहरु सच्याएर गान्धीवादी भएर बस्न सक्छु ।’
छविले शिल्पा आफूसँग बस्न नसक्ने भए एकपटकसँगै टेबलमा आएर कुरा गर्न समेत आग्रह गरेका छन् । उनले, आजसम्म कुनै पनि श्रीमतीलाई आफूले अन्यायमा नपारेको समेत लेखेका छन् । छविले अन्त्यमा लेखेका छन्–‘संसारको कुनै पनि अदालत तपाई जानु पर्दैन । छवि ओझाको अदालत सिधै आउनुहोस् । तपाइले न्याय पाउनुहुन्छ ।’
छविले शिल्पालाई अलग नै हुने भए पनि एकपटक आफूसँग आएर कुरा गर्न भनेका छन् । तर, शिल्पाले भने छविलाई वकिलसँग नै भेट गर्न भन्ने गरेको छविले उल्लेख गरेका छन् ।
