काठमाडौं । हालै मात्र इंग्लिस क्लब चेल्सीबाट स्पेनिस क्लब रियल मड्रिड आएका इडेन हाजार्डले २३ नम्बर जर्सी लगाएर खेल्ने भएका छन् । २८ वर्षीय बेल्जियन स्टार हाजार्डले रियलका लागि २३ नम्बरको जर्सी लगाउने अन्तरर्नष्ट्रिय मिडियाले उल्लेख गरेका छन् ।
स्पेनिस मिडिया मार्काका अनुसार चेल्सीमा १० नम्बरको जर्सी लगाएका हाजार्डले २३ नम्बर जर्सी लगाउने पक्का भएको हो । हाजार्ड चेल्सी टिममा मात्रै होइन बेल्जियमको राष्ट्रिय टिमबाट पनि १० नम्बर जर्सी नै लगाउँथे । अब भने हाजार्डका लागि २३ नम्बर जर्सी हुने देखिएको छ ।
रियलमा १० नम्बरको जर्सी लुका मोड्रिचले लगाइरहेका कारण उनले २३ नम्बरको जर्सी लगाउनु परेको हो ।कुनै समय डेभिड बेकह्यामले लगाउने २३ नम्बर जर्सी रोज्नुमा भने हाजार्डको कारण भिन्न छ । बास्केटबल खेलका समेत समर्थक हाजार्डले बास्केटबलमा लिजेण्ड खेलाडी माइकल जोर्डनले २३ नम्बर जर्सी लगाउने भएकाले उनले उक्त जर्सी रोजेका हुन् । गएको सिजन २३ नम्बर जर्सी सर्जियो रेगुलनले लगाएका थिए ।
हाजार्डले रियल मड्रिडमा ७ नम्बर जर्सी लगाउने कुरा आइरहे पनि त्यसमा उनको इच्छा देखिएको छैन । मड्रिडमा आएको केही समय इस्कोले पनि २३ नम्बर जर्सी लगाएका थिए ।
मड्रिडमा आफ्नो छुट्टै पहिचान बनाउनका लागि नै हाजार्डले २३ नम्बरमा जर्सीमा मन लगाएको फुटबल विश्लेषक बताउँछन् ।यसअघि हाजार्डले ७ नम्बरको जर्सी लगाउने चर्चा चलेको थियो । रियलमा छँदा पोर्चुगिज स्टार खेलाडी क्रिष्टियानो रोनाल्डोले लगाउने जर्सी हाजार्डले लगाउने भन्ने चर्चा थियो । तर, उनले सन् २०१९–२० को सिजनमा २३ नम्बरको जर्सी लगाएर देखिने छन् ।
चेल्सीबाट महंगो मूल्यमा रियल आएका हाजार्डले हाजार्डले गत सोमबार बिहानदेखि प्रि–सिजनको अभ्यास थालेका छन् । पाँच वर्षका लागि क्लबसँग सम्भौता गरेका उनी एकसय १३ मिलियन यूरोमा रियल भित्रिएका हुन् ।
उनको ‘इन्ट्री’पछि अब यस सिजन क्लबले उत्कृष्ट खेल्ने अपेक्षा रियलले लिएको छ । रियलको अघिल्लो सिजन भने खराब बितेको थियो ।
