काठमाडौं । नेपालको बजेटको इतिहास त्यति लामो छैन । पहिलो बजेट २००८ सालमा प्रस्तुत गरिएको थियो । त्यति बेला ५ करोड २५ लाख रुपियाँबाट सुरु भएको बजेट पछिल्लो दिन १५ खर्ब ३२ अर्ब ९६ करोड ९१ लाखसम्म पुगेको छ ।
तर अहिलेसम्म आम जनतालाई सन्तुष्ट हुने खालको बजेट नआएको आरोप छ । बजेट ल्याउने क्रममा कहिले ब्रिफकेस च्यातिएका छन् त कहिले संसद्मा प्रस्तुत नहुँदै बजेट सार्वजनिक भएको घटनाले अधिकांश बजेट विवादित र आलोचित बन्दै आएको छ ।
२००८ सालमा नेकपा एमालेका तर्फबाट अर्थमन्त्री बन्नुभएका सुरेन्द्र पाण्डेले आर्थिक वर्ष २०६६/६७ को बजेट ल्याउँदा बजेटमा ठूलै हंगामा मच्चिएको थियो । तत्कालीन नेकपा माओवादीका सांसदहरुले मन्त्रीको हातबाट बजेटको ब्रिफकेस नै खोसेका थिए । त्यति मात्रै नभई सोही ब्रिफकेसले मन्त्रीमाथि नै हमला हुँदा उहाँ घाइते हुनुभएको थियो । यस्तो दयनीय अवस्थाको स्मरणका लागि च्यातिएको त्यो ब्रिफकेस संग्रहालयमा राख्ने निर्णय गरिएको थियो ।
उक्त ब्रिफकेस अहिले काठमाडौंको छाउनीस्थित राष्ट्रिय संग्रहालयमा राखेको बताइन्छ । तर, राजनीतिक दबाबका कारण त्यसलाई प्रदर्शनीमा नराखिएको संग्रहालय स्रोतको दाबी छ ।
तत्कालीन अर्थमन्त्री पाण्डे भने आफूले उक्त घटना बिर्सिएको बताउँदै भन्नुहुन्छ– ‘अहिले पार्टी र हामी हिँड्ने बाटो एउटै भएको छ । त्यसैले बितेको कुरा नगरौं भविष्यको कुरा गरौं ।’
तत्कालीन नेकपा माओवादीका नेता नारायणकाजी श्रेष्ठ भने कम्युनिस्ट–कांग्रेस सबै खत्तम भएको टिप्पणी गर्दै भन्नुहुन्छ– ‘त्यति बेला सुटकेस फोड्ने हामी नै हौं, डा. बाबुराम भट्टराई प्रधानमन्त्री हुँदा नेपाली कांग्रेसले त्यो सरकारलाई बजेट पेस गर्न अवरोध पुर्याएको नेपाल समाचारपत्र दैनिकमा समाचार प्रकाशित छ ।
