फ्राइडे रिलिज अन्तर्गत आजदेखि चलचित्र ‘लभ स्टेशन’ प्रदर्शनमा आएको छ । चलचित्र ‘लभ स्टेशन’ लाई यस वर्षका प्रतिक्षित चलचित्रहरु मध्यको एक मानिएको छ । चलचित्रको व्यापारमा आएको खडेरीलाई केही हदसम्म ‘लभ स्टेशन’ले लयमा ल्याउने आश धेरैलाई छ । एकल रिलिजको अवसरको फाइदासमेत चलचित्र ‘लभ स्टेशन’लाई मिलेको छ ।
‘लभ स्टेसन’ मुलुकका १०१ चलचित्र भवनमा रिलिज भएको निर्माता गोविन्द शाहीले जानकारी दिए । फिल्म उज्ज्वल घिमिरेले निर्देशन गरेका हुन् ।
साङ्गीतिक प्रेम कथामा आधारित सामाजिक कथावस्तुसमेत समेटिएको फिल्ममा अभिनेता प्रदीप खड्का र अभिनेत्री जसिता गुरुङसँगै रमेश बुढाथोकी, प्रकाश शाह, रेशु भट्टराई, विनोदकुमार पौड्याल, प्रिया रिजाल, सरु विष्ट, रवि डङ्गोल, दिनेश काफ्ले, कालु रानासहितको अभिनय छ ।
यस चलचित्रका २ वटा गीत र ट्रेलरलाई दर्शकले मन पराएका छन् । चलचित्र ‘लभ स्टेशन’मा अभिनेता प्रदीप खड्काको पनि लगानी रहेको बताइएको छ ।
दार्जिलिङ, कालिङपोङ, खार्साङ, मिरिक, इमाल र काठमाडौँमा चलचित्रको छायांकन गरिएको छ ।
फिल्म प्रदर्शनको पूर्वसन्ध्या पारेर निर्माण युनिटले बिहीबार गौतम बुद्ध अन्तर्राष्ट्रिय क्रिकेट मैदान निर्माणका लागि धुमुर्स-सुन्तली फाउन्डेसनलाई ५० हजार रुपैयाँ सहयोग प्रदान गरेको थियो ।
फाउन्डेसनका अध्यक्ष सीताराम कट्टेलसँगको छलफलपछि ‘लभ स्टेशन’को नेपालमा प्रदर्शन भएको मुनाफाको ५ प्रतिशत रकम सो क्रिकेट मैदान निर्माणका लागि फाउन्डेसनलाई प्रदान गरिने घोषणा पनि बिहीबार भयो ।
