वेस्ट इण्डिजका क्रिस गेललाई विश्वको सबैभन्दा विस्फोटक ओपनर भन्दा फरक नपर्ला। उनले इण्डियन प्रिमियर लिगमा यसको प्रमाण पेस गरेका छन्।
जारी आइपिएलमा उनी किङ्स इलेभेन पंजाबका लागि खेलिरहेका छन्। सोमबार राजस्थान रोयल्स विरूद्धको खेलमा उनले ७९ रनको पारि खेल्देै टोलीलाई जित दिलाउन महत्वपूर्ण भूमिका खेले। यस क्रममा उनले ८ चौका र एक छक्का प्रहार गरे।
हिजोको खेलमा गेलको ब्याटिङ् हेर्दा उनले आईपिएलमा आफ्नो सातौं शतक पूरा गर्ने छनक दिएका थिए तर उनी आउट भए। शतक नबनाई आउट भएपनि गेलले आईपिएलको इतिहासमा सर्वाधिक छिटो ४ हजार रन बनाउने कीर्तिमान बनाउन सफल भएका छन्।
उनले कुल ११२ म्याचबाट यो आँकडा पूरा गरेका हुन्। म्याचअगि गेलको नाममा ३९९४ रन थियो। उनले त्यसमा ६ रन जोडेर सो कीर्तिमान बनाए।
योसँगै लिगमा क्रिसको नाममा सर्वाधिक शतक हान्ने खेलाडीको कीर्तिमान पनि छ। उनले ६ शतक लगाइसकेका छन्।
