विराटनगर । तीव्र गतिमा रहेको हायसले ठक्करदिंदा एक बालकको घटनास्थलमै मृत्यु भएको छ। अन्य तीन जना घाइते भएका छन् ।
पूर्व–पश्चिम राजमार्गअन्तर्गत मोरङको सुन्दरहरैंचा नगरपालिका–८ मा बा ५ ख ३५४ नम्बरको हायसले ठक्कर दिंदा सुनसरीको धरान उपमहानगरपालिका–१७ का १३ वर्षीय सविन मग्रातीको घटनास्थलमै मृत्यु भएको इलाका प्रहरी कार्यालय बेलबारीका प्रहरी निरीक्षक रामकुमार राईले बताए।
तीव्र गतिमा गुडिरहेको हायस अनियन्त्रित भएर सडकमा हिंडिरहेका बालकलाई ठक्कर दिएको थियो। उक्त दुर्घटनामा चालकसहित तीनजना घाइते भएका छन्। घाइते हुनेमा पथरीशनिश्चरे नगरपालिका–९ का २९ वर्षीय रमेश बस्नेत, हायसमै सवार सुन्दरहरैंचा-८ का १४ वर्षीय सुमन रम्तेल र उर्लाबारीका २१ वर्षीय सचिन भित्रीकोटी घाइते भएको प्रहरीले जनाएको छ।
स्थानीय मेडिलकमा उपचारपछि चालकलाई प्रहरीले नियन्त्रणमा लिएको छ। घाइते अन्य दुईजनाको विराट नर्सिङ होममा उपचार भइरहेको छ।
